Prome Minister Evelyn Wever – Croes: Den cuadro di conscientisacion di “Dia Mundial di Salud Mental”, 10 di October:
CONSCIENTISACION TA HOPI IMPORTANTE PA MEHORA E COMPRENDEMENTO DI SALUD MENTAL Y SU CONDICIONNAN
Y tambe pa aumenta e acceso na cuido y yudansa pa esnan cu tin mester di dje
ORANJESTAD – Den cuadro di conscientisacion di “Dia Mundial di Salud Mental”, 10 di october, Prome Minister Evelyn Wever – Croes a bisti na biña pa trece conscientisacion na e tema di salud mental. Prome Minister a expresa algun recomendacion tocante e tema aki enfatisando e importancia pa cada persona busca su mesun paz mental of busca ayudo.
Conscientisacion tocante salud mental ta un iniciativa hopi importante pa mehora e comprendemento di salud mental y su condicionnan como tambe pa aumenta e acceso na cuido y yudansa pa esnan cu tin mester di dje. Como sociedad, hunto nos mester kita e malcomprendemento cu tin tocante condicionnan mental cu hopi biaha ta pone cu hopi hende ta sconde y sufri den silencio y no ta busca ayudo pa su mes y por lo tanto no ta haya e ayudo necesario.
Trankilidad mental ta na alcanse di nos tur. Ta importante pa cada persona realisa tur dia cu e mester pone atencion riba su propio salud mental y busca e manera pa haya su mesun trankilidad mental. E ta necesario pa cada persona realisa cu pa e ta feliz, e mes mester haci su mes feliz y no depende di un otro pa haci’e feliz. Pa mantene un ekilibrio ta un tarea constante. Prome Minister a comparti e manera cu ta yuda e pa haya su trankilidad mental sperando cu esaki por yuda otronan.
Prome Minister: “Pa ami, algo cu ta yuda hopi ta naturalesa, cana den naturalesa, sinta den naturalesa, mira naturalesa y scucha naturalesa. Esakinan ta trece hopi trankilidad pa mi, maske ta un rato.”
Sinembargo, ta importante pa tur hende comprende y realisa cu ora bo so no por trece e paz mental pa bo mes, pa busca ayudo sea den famia, amigo y finalmente cerca un profesional. “Corda cu tin hopi hende cla pa yuda bo. Salud mental ta algo serio y nos tur mester tey pa yuda otro,” Prome Minister a enfatisa.
