Minister Maduro di Finansa ta presenta e ‘Plan di Impuesto 2023’ den un programa special na television

Dia 30 di september ultimo Minister Maduro a anuncia e ‘Plan di Impuesto 2023’ cu tin como meta pa yega na un sistema fiscal mas simpel y husto. E plan ta encera e recuperacion di Aruba su finansa publico por medio di compensacion, reparticion husto y mehoracion di cumplimento di impuesto di ciudadano y bishitante. Mas concreto e ‘Plan di Impuesto 2023’ lo conta cu introduccion di un tarifa nobo di BBO cu ta resulta den un tarifa combina di BBO, BAVP y BAZV di 7%, hunto cu un pakete di compensacion pa individual y negoshi pa yuda mitiga e efectonan di inflacion. E pakete di compensacion individual ta conta cu un rebaho di 2% riba impuesto di entrada, lo subi e suma liber di impuesto na 30.000 mil florin, lo separa e cobransa di impuesto riba entrada pa pensionado, y lo hisa e ‘reparatietoeslag’ pa pensionado di SVb cu 45 florin.

Tur esaki lo yuda baha e peso di impuesto riba esnan mas vulnerabel den comunidad, cual ta nos grandinan y esnan cu ta ricibi un salario cu ta menos di 2500 florin pa luna. Pa negoshi lo reduci e ‘winstbelasting’ di 25 pa 22% y lo mantene e ‘investeringsaftrek.’ Nos bishitantenan lo conoce un subida di e ‘toeristenheffing’ y lo reparti e fondonan aki na un manera mas husto entre ATA, Gobierno y e fondo di TPEF cu ta pa mehora nos producto turistico. E plan ta conta tambe cu algun cambio pa asina mehora e cumplimento cu e deber fiscal na nos Pais. Minister Maduro ta haci un invitacion pa sintonisa e programa special na television pa haya sa mas di e ‘Plan di Impuesto 2023’ cu ta drenta na vigor 1 di januari 2023. E dianan di e programa ta diamars 11 di oktober pa 8:00 di anochi na Diario TV/Canal 48, diaranson 12 di oktober pa 8:30 di anochi na Canal 22 y diahuebs 13 di oktober pa 7:29 di anochi na Telearuba Canal 13.