Prome Minister Evelyn Wever-Croes: MESTER COMPRENDE CU INVESTIGACIONNAN MANERA DI ARUBAHUIS TA TARDA

Parlamentarionan cu ta wordo investiga of tin coleganan cu ta wordo investiga,

Prome Minister mes a pidi pa un investigacion y lo informa Parlamento ora investigacion keda cla

Durante e conferencia di Gobierno di Aruba diahuebs mainta, na unda cu Prome Minister Evelyn Wever-Croes a reacciona riba un mail anonimo cu ta circula cu contrincantenan politico a publica tocante Arubahuis, Prome Minister un biaha mas ta recorda politiconan cu cada biaha ta trece esaki dilanti a sabiendas cu e investigacion ta siguiendo su curso, cu ta e mes a pidi pa haci un investigacion riba Arubahuis y niun dia a sconde nada.

“Mi kier recorda oposicion y tur politico cu cada biaha kier bin cu e topico aki dilanti, cu ta AMI a pidi un investigacion den Arubahuis y cu semper ma bisa cu esun cu haci algo robes, e mester carga su responsabilidad, sinta riba su blaar sin importa kende e persona ta”, Prome Minister a enfatisa.

Prome Minister a haya basta insistencia di oposicion especialmente di Parlamentario Marisol Lopez-Tromp pa haya e rapport di e investigacion, y recientemente atrobe a manda un carta na Prome Minister. Prome Minister atrobe a contesta Parlamentario Lopez-Tromp manera el a haci den varios ocasion indicando cu manera e investigacion keda cla, Lopez-Tromp lo wordo informa.

“Mi ta kere cu Marisol Lopez-Tromp mas cu tur hende mester por comprende cu investigacionnan ta tarda siendo e mes tambe sospechoso di e caso Kukwisa cu ta tardando hopi mas cu un aña”, Prome Minister a remarca.

E caso Kukwisa a causa hopi daño na Aruba. Pasobra ta e ministernan di infrastructura anterior a bay haci wega politico cu Departamento manera DIP, awe ta perhudicando miles di ciudadano cu no por haya tereno pa traha nan cas, no por haya tereno di huurgrond pa planta pa motibo di casonan di Kukwisa. Pero no por forsa e investigacion riba Parlamentario Lopez-Tromp. Mester laga e investigacion tuma su curso. Mescos tambe ta e caso di investigacion di ArubaHuis.

Parlamentario Gerlin Croes tambe ta pidi e rapport di investigacion siendo e tambe sa cu e investigacion ta andando. Y como hurista, e tambe mester por comprende cu casonan di investigacion ta tarda. Manera ta e caso tambe di Parlamentario Benny Sevinger cu ta colega di Parlamentario Gerlin Croes, e caso Avestruz. “Sinembargo Parlamentario Gerlin Croes a defende y brasa su colega mientras e tawata sa cu su colega ta wordo investiga pa corupcion. E caso aki ta andando ya pa 3 aña. Kiermeen cu Parlamentario Gerlin Croes sa cu casonan asina ta tarda y no por wordo forsa, no por insisti pa nan pura pa caba, pasobra nos kier pa nan bay bon”.

Prome Minister ta haci un apelacion riba e politiconan oponentanan aki, tin hopi cos cu nan por haci nan trabou como oposicion riba dje. Pero no insisti pa un investigacion manera esun di Arubahuis wordo daña cu nan insistencia. E investigacion, Prome Minister ta enfatisa, ta bayendo bon y mester lage cana su curso. “Aruba ta pasando den hopi reto. Retonan cu nos a premira y retonan cu nos no a premira. Nos no por influencia e retonan manera e guera di Ukrania cu a causa un crisis inflatorio enormemente grandi. Na e momento aki, Aruba tin mester di su miho politiconan. Aruba mester di nos tur pa hiba nos pais padilanti. Tin hopi cos pa nos enfoca riba dje. Ban uni forsa pa asina hunto nos enfoca riba e cosnan importante pa nos pais”, Prome Minister a expresa