Parlamentario Marco Berlis (MEP):
Caso Avestruz ta sigui 24 y 25 di october

Caso Avestruz ta bon conoci den pueblo di Aruba y ta wordo sigui di cerca pa pueblo di Aruba. Un caso serio den cual tin 5 acusacion serio contra Benny Sevinger. Riba e prome fecha di e caso hopi informacion valioso a bin dilanti y sigur por a constata hopi cosnan cu no ta mustra mucho bon pa Benito Sevinger cu ta sospechoso den e caso aki. E hecho cu el a basha stempel bay gol sin sa supuestamente kende e ta aprobando pa un tereno, ni pueblo, ni huez y ni fiscal ta kere. Ta interesante pa remarca cu den diferente ocasion Benito ta perde memoria di cierto actonan cu el a comete. Cierto ta cu e la tuma sumanan gigante pa despues otorga sponsernan varios tereno, cu cual despues nan a haci negoshi bendiendo esakinan pa sumanan gigante.

Loke tabata resalta durante e prome dia den corte, tabata e hecho cu cada rato e sospechoso Benito tabata perde su memoria:
• Huez a puntra si Benito tabata sa si e compania cu a dune donacion pa su campana pa e suma di 100 mil florin tabata di Harms. Aki Benito a perde memoria.
• Huez a puntra si Benito tabata sa cu OM a haya documentonan firma cu “dezerzijds akkoord” cu no tabata registra na DIP. Huez a puntra Benito dicon y atrobe e no por a contesta y a perde memoria.
• Huez a puntra Benito si e tabata sa cu e compania ZENWAVE tabata di yiu di su amigo Kurt Harms. Atrobe Benito a lubida.
• Ora Huez a puntra Benito si e tabata sa si e negoshi tabata di Sussebeek, el a bolbe haya un blackout.
• A puntra Benito si e tabata sa cu Lowenstein tabata sponsor su campaña. Benito a bisa si pero no ta corda cuanto esaki tabata ta. Otro fayo mas di memoria.
Cosnan cu Benito a papia cu ta contradeci su mes palabranan:
• Prome el a bisa cu hopi enfasis cu e ta stempel y firma tur peticion di tereno sin wak, pero mas dilanti e ta bisa cu e tabata firma y scan e peticionan pa tereno.
• Benny supuestamente ta firma sin wak e peticion di Sussebeek, anto un rato prome a declara cu e ta scan y despues firma documentonan di peticion. Wel kico ta berdad anto?
• Huez a puntra dicon Benito a haya donacion di Lowenstein riba 13,15,18 y 20 di September net dos dia prome cu eleccion di 2017? Benito ta reconoce cu e la haya placa di sponsorship di Lowenstein pero no ta contesta pakico a duna Lowenstein tereno net na October 2017 mientras Benito tabata minister demisionario y net prome cu e mester a entrega su puesto. Huez ta haya straño cu e peticion di Lowenstein ta haci na 2015 y awor net prome a baha su puesto e ta aproba esaki.
Na final Huez a bisa cu henter e situacion ta sugeri cu esaki tabata un regalo di despedida cu Benny a duna Lowenstein. Di e forma aki e prome dia den corte a termina. Ban wak kico tur lo bin na cla October 24 y 25 den corte na unda sigur mas informacion lo bira disponibel na pueblo.

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!