Prome Minister Evelyn Wever-Croes:
GOBIERNO TA TRAHANDO RIBA MANEHO PA UTV/ATV
ORANJESTAD – Prome Minister Evelyn Wever – Croes conhuntamente cu colega Minister Ursell Arends tabatin un reunion cu e comision institui pa Prome Minister, pa atende cu e problematica di UTV/ATV. Den e reunion aki e comision a propone pa regula e mercado y busca un balans entre desaroyo economico y turistico, teniendo cuenta cu medio ambiente.
Aña pasa july, Premier Wever – Croes a institui un comision multi disciplinario cu ta consisti di diferente departamento di Gobierno, pa atende cu e problematica di UTV/ATV na Aruba. E departamentonan y institutonan aki a reuni tur luna pa hunto delinea un plan strategico con Gobierno por atende cu e problematica aki.
‘UTV/ATV ta un actividad cu specialmente turistanan ta gusta haci aki na Aruba, pero e realidad ta, cu e actividad aki ta causa daño na Aruba su medio ambiente, e no ta mes safe cu lo desea pa e ta y tambe e actividad ta causa molester cerca habitantenan den cierto barionan caminda nan ta frecuenta.’
Prome Minister a splica cu basa riba e puntonan di preocupacion aki, a pidi e comision pa un bin cu un proposicion. E comision a propone pa regula e mercado y no stop e actividad completamente. Mester enfoca riba busca un balansa entre desaroyo economico y turistico, protehando medio ambiente.
A TUMA DOS DECISION IMPORTANTE
Premier Wever – Croes a sigui bisa: ‘basa riba e proposicion aki a tuma varios decision, for di cual e dosnan principal ta:
(1) Lo introduci legislacion pa stop importacion di e vehiculonan pa un tempo y
(2) e otro decision ta, cu lo bin cu un moratorio riba dunamento di permiso, pa trece poco trankilidad den e mercado na Aruba. Mientrastanto ta sigui traha pa bin cu un ruta alternativo pa uzo di e UTV/ATV nan. Banda di esaki ta calculando kico ta e maximo cu Aruba por carga di e vehiculonan aki.
‘Proximamente ora cu e proyectonan ta den fasenan mas avansa, e comision lo duna mas informacion di esaki.’
Pa conclui, Prome Minister a expresa di ta sumamente contento cu e trabou eherci den e comision. Tambe cu tin un consencus cu e actividad ta un distraccion sano, pero cu mester crea un balansa pa tur esnan cu practica esaki hacie den forma safe, sin causa mucho daño na naturalesa.
