Diaranson 19 october na HIAS Community Center riba L.G. Smith Blvd. 128 (banda di Wendy’s) cuminsando 7:30pm lo tuma luga e prome reunion di un grupo di apoyo pa comunidad transgenero, no-binario y no-conformando.

Personanan transgenero ta esnan cu un identidad di genero diferente di esun cu nan a wordo prescribi na nacemento. (Personanan cisgenero ta esnan cu un identidad di genero cu ta cuadra cu loke nan a wordo prescribi na nacemento).

Comunidad transgenero, incluyendo esnan no-binario y no-conformando por experiencia stress significativo nabegando un mundo cu ta trata ser cisgenero como e norma. Falta di conocemento di loke kier men ta trans y maltrata personanan cu no ta cuadra dentro di e norma tin su efectonan negativo. Wordo prescribi un genero ekiboca por hiba na trauma psicologico, pero tin otro hende pa papia cu, por haci un diferencia grandi den bo capacidad pa enfrenta.

Mirando e necesidad pa un grupo di apoyo pa esnan trans na Aruba, diferente activista a uni pa brinda un espacio. E grupo lo wordo facilita pa psicologo Jermin Bell hunto cu activista trans Sr. Veer Alwani. Inicialmente kier brinda un plataforma cu lo sirbi como un “safe space” of luga sigur caminda participantenan por comparti nan experiencianan. Sr. Bell ta spera di miho compronde kiko e necesidadnan di e comunidad ta y con por brinda miho sosten psicosocial. Sr. Alwani, un homber trans, cu experiencia di participa den gruponan similar na Merca, conoce e beneficio di gruponan similar na otro pais y ta spera cu mas conscientisacion por yuda crea un sociedad mas inclusivo.

Mientras Hulanda ta bezig ta debati un di e leynan di genero mas progresivo na mundo, aki na Aruba no tin caminda di cana pa esnan trans por actualisa nan documentonan oficial. Aunke ta posibel pa tur hende bay corte y legalmente cambia nan nomber, no tin posibilidad na Aruba pa cambia un persona su genero of opta pa ningun genero manera algun pais ta permiti y ta wordo describi cu un X den documentonan oficial.

E prome paso ta trece tur esnan di comunidad trans hunto y habri e dialogo pa mira con por brinda sosten y tuma accion pa mehora bida di e comunidad. Esnan interesa por tuma contacto cu veeralwani@gmail.com pa mas informacion. Aunke no ta necesario, esnan cu ta desea por avisa di nan participacion na Veer su email pa asina yuda e organisadonan cu preparacionnan.

Participacion na e evento ta completamente gratis, NO tin necesidad di registra (por simplemente presenta e anochi) y tanto presencia como loke keda discuti lo ta completamente CONFIDENCIAL.