WEB ARUBA A HAYA OPORTUNIDAD FABORABEL PA HEDGE

ORANJESTAD – WEB Aruba ta contento di por anuncia cu siman pasa a haya e oportunidad faborabel pa HEDGE pa proteha su posicion financiero en caso prijs di combustibel subi atrobe. Asina e compania di awa y energia a informa pa medio di un comunicado. Pa e di cuater cuartal di aña 2022, WEB a logra hedge e prijs di combustibel na $77.00 pa bari. Esaki ta nifica cu si prijs subi ariba di e prijs aki, WEB lo keda paga $77.00 y no e prijs di mercado. Di otro banda, si e prijs baha bou di $77.00, WEB lo paga e prijs di mercado na e momento ey. Di e forma aki, WEB ta proteha su posicion financiero na momento cu prijs di combustibel subi atrobe y na mesun momento ta limita e impacto di esaki riba e perdida cu WEB lo tin na aña 2022.

WEB ta uza Hedging como un tipo di seguro. E ta encera compra di un seguro contra posibel variacionnan indesea di e prijs di combustibel. Asina ta stabilisa e prijs cu mester paga pa un periodo defini, den e caso aki e di cuater cuartal di aña 2022. Pa yega na e seguro aki, WEB ta paga un prima. Cu esaki ta cubri e posibilidad cu ta paga mas na momento cu e prijs combustibel subi riba e prijs pa cual a cumpra e seguro. Asina WEB y pues comunidad por tin trankilidad y no mester ta mucho preocupa cu volatilidad di e prijs di combustibel.

Obhetivo principal ta pa proteha subida di prijs di combustibel. P’esey e prijs maximo ta e prome obhetivo pa crea proteccion pa WEB, pa su clientenan y Aruba den su totalidad macro economico.