Minister Rocco Tjon:
A REUNI CU SINDICATO DI POLIS DI ARUBA (SPA) Y ALTO MANDO DI CUERPO POLICIAL

ORANJESTAD- Ayera a reuni cu Sindicato di Polis di Aruba (SPA) hunto cu representante di alto mando y Alto Inspector Sr. Adrick Croes, unda a toca varios puntonan clave. Un reunion sumamento positivo, caminda a enfoka riba e tema di maneho, “ziekteverzuim”, e importancia di e procesonan di “bedrijfsvoering”, “personeelszorg” y a toca particularmente e parti di uniform, opleidingen y e mudamento pa e edificio di ex-Codemsa. A splica cu Ministerio lo bay traha riba un “meerjarenbeleidsplan” pa loke ta trata “bedrijfsvoering”, cual a cay na e agrado di e sindicato, como cu esaki lo percura cu structuralmente lo yega na tur material cu polis tin mester di dje y cu lo wordo presupuesta debidamente, pa por haya esakinan na tempo.

Pa e parti di uniform, a splica cu a tuma lugar e proceso pa por yega na esaki. Bisando esaki di parti di Ministerio, a manda un carta cu diferente instruccion pa cuerpo policial, dirgi na e alto mando y e parti di “bedrijfsvoering”, pa asina dentro di poco nan por cuminsa cu e proceso di adkiri uniform como tambe e materialnan necesario.

Pa e parti di e mobile app (ACTPOL), SPA a duna di conoce cu nan ta desea di por haya acceso na mas informacion tambe. Segun Minister Tjon, actualmente esaki ta den proceso, como tin combersacionnan andando cu e asocacion di seguro como tambe departamento di impuesto pa asina haya mas acceso na informacion, teniendo na cuenta cu e reglanan y leynan vigente pa e informacion delicado aki. Di e manera aki, e informacion lo por bira mas accesibel y nan lo por haya acceso na e informacion. A cuminsa cu e proceso aki, y dentro di poco lo cuminsa cu e acceso por medio di e “mobile data terminals” cu lo bin den e autonan di polis, cu lo cuminsa cu un proyecto piloto y di e forma aki, nan tambe lo tin mas acceso na informacion.
Referente e punto di opleiding, SPA hunto cu Alto Comisario suplente lo bay traha riba esaki pa wak con por “werk weg” e retraso pa loke ta trata e “kaderopleiding” y e “hoger kaderopleiding”.

Por ultimo a toca e parti di e mudamento pa e edicio di ex-Codemsa, unda cu lo tin diferente departamento di husticia, ademas di diferente departamento di Cuerpo Policial cu lo bay muda pa e edificio aki. A base di esaki, a splica tambe ful e trayecto legislativo como tambe e parti di deliberacionnan cu APFA, di cual fin di luna aki lo mester haya e “programma van eisen”, unda ta delinea tur e necesidadnan pa loke ta trata Cuerpo Policial, pa asina den Februari por traha e plan definitivo pa despues bay parlamento.
Na final di reunion, a planea algun punto clave pa traha riba nan, pa asina tin nan prepara pa e siguiente reunion cu lo tuma luga proximo luna.