Entre mas di ocho mil hotel na mundo

Aruba a gana e “Alice S. Marriott Award for Community Service 2022”

Pa Aruba Marriott Resort & Stellaris Casino, e fecha aki ta uno hopi special. Director di Human Resources, Ruthline Theysen a bay ricibi e Alice S. Marriott Award na Bethesda, Maryland, pa e esfuersonan cu e compleho di hotelnan Marriott ta eherce anualmente den forma di trabao na comunidad. Entre mas di 8 mil hotel Marriott na mundo, a scoge e Aruba Marriott Complex pa ricibi e premio aki.

Raoul Lemmerling, Complex General Manager di Aruba Marriott Resort & Stellaris Casino, Aruba Surf Club y Aruba Ocean Club, ta conta cu Alice S. Marriott tabata casa di e fundado di e compania, esta J.W. Marriott den decada di 1920. Despues di 95 aña, ta celebra Alice, kende a nace rib’e dia aki na aña 1907, ya cu el a haci hopi trabao pa e comunidad. E tabata un persona cu hopi amor pa comunidad y na Aruba Marriott, tin e spirito similar.

Segun Lemmerling, e asociadonan ta duna hopi di nan mes y generalmente no ta papia hopi di esaki, pero ta haci hopi den comunidad, pa diferente scol, pa educacion, pa yuda esunnan di menos recurso y tambe yuda e muchanan den necesidad. Y naturalmente esaki ta efectua p’e asociadonan cu ta duna nan tempo liber pa yuda e organisacionnan aki y hasta ta recauda fondo p’e animalnan. Esaki a haci cu Aruba Marriott Complex a gana e premio, cu gran honor.

Lemmerling a remarca cu Aruba Marriott kier ta bon embahador y kier ta bon ricibi den e comunidad di Aruba y ta resalta door di para hunto cu e comunidad di Aruba, haciendo bon hunto. Riba dia 20 di november, un y tur ta invita pa participa na un brunch special na ocasion di Thanksgiving. E ta costa $59 pa persona y tur ganashi ta bay pa Fundacion Ban Uni Man pa Cria nos Muchanan, pa combati e desaroyo negativo di muchanan cu ta bay scol cu stoma bashi.

UN BON SENTIMENTO

Reuella Reeberg, Human Resources Manager a splica cu tur aña, desde cu Marriott ta funda na Aruba, semper a enfoca pa duna bek na comunidad. Ta algo cu ta haci simplemente di nan curason. Sinembargo, toch ta sinti bon pa wordo reconoci pa tur loke nan ta haci. Specificamente a reconoce nan pa tur nan esfuerso cu nan a haci den aña 2021 pa 2022, cu ta enfoca riba hoben. A brinda hopi luga pa stage na Marriott pa studiante local entre otro for di SPO, EPB, EPI, Universidad di Aruba, tambe fo’i Hulanda. A tuma mas di 100 stagiaire durante e aña. Simplemente nan ta kere den e hubentud di Aruba y kier mustra e hobennan e industria di hospitalidad, ya cu nan t’e futuro di Aruba y kier pa nan bin Aruba y pa nan por traha cu e resort y crece den nan carera.

E PREMIO

Marriott no simplemente ta establece den un mercado pa haci ganashi. Pero ta kere den duna bek n’e comunidad. Durante aña ta organisa diferente evento pa yuda comunidad. Fuera di esey tin un fundacion cu yama Care Foundation, crea p’e trahadonan di Marriott mes, cu ta contribui financieramente sea tur kinsena of tur luna cu un suma di placa y cu e fondo aki ta haci diferente proyecto pa comunidad di Aruba. Por ehempel, Aruba Marriott ta traha hopi cerca cu Fundacion Pa Nos Comunidad y ta haci diferente actividad durante aña pa por yuda e famianan cu mas tin mester di esaki. Ta gradici e trahadonan cu tin hopi aña ta contribui n’e fundacion aki. Danki na nan por haci asina hopi cos bon p’e comunidad. Tambe ta gradici nan pa semper ta disponibel pa yuda cu cualkier scol of cualkier beach of community clean up. E asociadonan ta simplemente e curason di Marriott y sin nan, nan lo no t’ey. Ta yama nan danki pa tur e esfuerso haci y e premio aki ta pa nan!

PREMIO ALICE S MARRIOT NA SERVICIO DI COMUNIDAD

Crea na 1992, e premio aki ta honra e herencia di casa di e co-fundado di e empresa pa reconoce e propiedad, unidad di negoshi of departamento corporativo y na su asociadonan p’e excelencia den e proposito di contribui na un mundo mas compasivo y cu speransa. E premio aki ta celebra e ekipo cu ta duna miho ehempel n’e filosofia eterno di Alice S. Marriott: “Door di duna nos tempo, energia y recurso generosamente, nos ta enrikece bida di otro.”

RECLUTA TRAHADO

Reeberg ta agrega cu si abo kier forma parti di un compania cu no ta simplemente un trabao, sino cu tambe tin un meta pa ‘serve our world’, anto considera pa join e famia di Marriott. Tin varios posicion habri na Marriott y ta invita pa aplica door di subi marriott.com/careers, busca Aruba y haya tur e posicionnan cu tin habri, sea full-time of part-time, unda cu abo tambe por forma parti di un compania espectacular.