Parlamentario Alvin Molina (MEP):
Ban sigui cu e lucha pa cartera di pueblo
Aruba a logra ricibi e confiansa di Hulanda. Un logro bon mereci cu no tabata facil pa yega na dje. Obvio ta si cu tin hopi reto riba caminda pa e logro aki bira un exito completo pa Aruba.
Riba nivel di gobierno Minister President y su gabinete a demostra di tin un vision progresivo pa cumpli cu loke ta necesario pa Aruba y ta ehecutando esaki. Parlamento Hulandes tambe ta mira e esfuersonan di Aruba. Durante mi bishita di trabou na Hulanda mi a reuni cu Parlamentario Roelien Kamminga riba e topico aki. Sra. Kamminga ta miembro di partido VVD cu ta un di e partidonan mas critico pa cu e desaroyonan den Caribe. Mi ta contento cu sra. Kamminga tambe ta mira cu Aruba ‘langzaam maar zeker’ ta recuperando di e crisis mundial, mientras ta haciendo su aparato publico mas efectivo. Esaki sigur a yuda cu Aruba no a haya e aanwijzing.
Loke e logro aki ta trece cune ta cu Aruba por sigui traha riba recuperacion di nos economia, mientras nos por tene na cuenta nos situacion local y manteniendo autonomia di nos Parlamento. Nos ta mira esaki caba den desaroyonan por ehempel miho beneficionan pa pensionado, medidanan menos grave den azv y recuperacion di salario di ambtenaren.
Danki na e Gobierno y Parlamento di Hulanda pa e confiansa. Awo ban sigui traha pa haci e cartera di pueblo mas fuerte.
