PROME MINISTER A BISHITA E 10 SCOLNAN CU MAS MUCHA A PARTICIPA NA E COMPETENCIA DI PINTAMENTO PA CONSCIENTISACION DI LEY DI CACHO
Scolnan a ricibi certificado

ORANJESTAD – En conexion cu ‘Dia di Bestia’ 4 di october, tabatin un e concurso di pinta y kleur “Ley Di Cacho” 2022, Prome Minister Evelyn Wever-Croes a haci un recorido na e Top 10 scolnan di cantidad di mucha cu a participa na e competencia di pinta y kleur, pa consientisacion di ley di cacho. Prome Minister a entrega un certificado di participacion na e 10 scolnan aki.

E concurso tabata pa scolnan preparatorio y scolnan basico, caminda cu tur alumno por a pinta algo cu tin di haber cu Ley di Cacho. Ademas a pidi e scolnan pa papia cu e muchanan y conscientisanan di locual e ley ta contene.
E Top 10 scolnan a base di cantidad di participacion ta : Rayo di Solo Kleuterschool na San Nicolas, Paulusschool na San Nicolas, Colegio Sagrado Curason na Savaneta, Maria School na Sta Cruz, School Souer Juliette na Ayo, Colegio Pastoor Kranwinkel na Paradera, Mon Plaisir Basis na Oranjestad, Imelda Kleuterschool Oranjestad, Colegio Bon Bini Oranjestad y a termina na St. Anna School na Noord.

Prome Minister Wever – Croes a expresa cu e ta un honor pa a bishita e scolnan y scucha tur locual e muchanan tocante Ley di Cacho a traves di e competencia di pintamento. E muchanan a siña tocante cuido di cacho y e importancia pa cachonan ta mara (na ‘leash’) ora cu sali cu nan pafo di cura pa su proteccion.

Anteriormente ya a reparti premio na esnan cu a gana cu pintura di mas bunita y awo Prome Minister a entrega certificado na e top 10 scolnan cu mas mucha a participa. E scol cu tabatin mas participante ta St. Anna School cu 139 participante. Por ultimo Premier – Wever – Croes a gradici e scolnan pa nan participacion y ta desea cu ta sigui mira participacion di scolnan na otro competencianan den futuro pa sigui aumenta conscientisacion cerca nos muchanan.