Grupo Contra Tubo di Gas, Grupo CTG

Ultimamente ta den noticia e asunto di cambio di azeta crudo diki (heavy fuel oil) pa gas likido (LNG) pa WEB Aruba N.V. por usa pa crea energia y produci coriente pa N.V. ELMAR Aruba. LNG lo ta miho pa salud di hende, medio ambiente y lo por reduci e prijs di awa y coriente.

Utilities Aruba N.V., cu ta representa gobierno di Aruba, a duna e compania Eagle LNG (Texas, USA) e contract pa ehecuta e plan aki. Ta trata aki di un contract secreto, un asina yama “non-disclosure agreement” cu Eagle LNG a negocia. Pues tur informacion cu tin den e contract aki referente con, ken, kico, ki tempo y risiconan, etc. no ta disponibel pa niun hende.

Eagle LNG a cuminsa cu sesionnan di informacion pa habitantenan interesa y tambe a cuminsa bishita cas den e barionan concerni. Si ta bon bo persona recientemente por a haya bishita di representantenan di Eagle LNG pa papia riba ponemento di tubo di gas den bo caya of area.

Anteriormente Eagle LNG a papia di core un tubo di gas riba tera for di refineria RDA pa WEB Aruba N.V. riba e mesun ruta cu e 3 tubonan actual ta core. E plan aki a cambia y awo Eagle LNG kier coba un tunnel pa pasa e tubo di gas bou tera. Den algun luga e intencion ta pa coba e caminda dilanti bo cas pa pasa e tubo. Eagle LNG ta bisa cu e proceso aki ta hopi sigur, cu e no lo trece risico pa e habitantenan y nan cas.

Pero for di informacionnan ricibi y cu nos a busca riba internet ta sali afo cu e coremento di tubo di gas bou tera tin bastante risico envolvi. E tubo cu lo core for di refineria pa WEB Aruba N.V. lo ta un tubo di transmision di gas cu ta bou di hopi presion. E presion ta necesario pa WEB por mantene su ekiponan den funcion continuo.

Segun norma Mericano y Hulandes, un tubo di transmision di gas no ta permiti pa pasa den areanan habita.  Representantenan di Eagle LNG a bisa esnan cu nan a bishita cu e tubonan ta similar cu e liñanan di gas cu ta pasa den ciudadnan Hulandes y Mericano. Sinembargo, esaki no ta corecto ya cu aki ta papia di tubo di distribucion. Na Aruba, e unico caminda unda lo tin tubo di distribucion di gas ta den WEB Aruba N.V. mes, pa bay pa e machinnan.

Esey ta e sistema comparable cu e liña di gas pa cushina (LPG). Pero pa WEB Aruba N.v. haya e gas aki (cu despues mester pasa den e liñanan di distribucion) mester di tubo mas grandi, cu e ora ta bin cu presion mas halto y cu mucho mas gas (mas massa) for di RDA. Ta e tubonan aki cu massa halto di gas lo pasa banda, abou y sigur cerca di nos casnan, cas di anciano Huize Maristella, scolnan y lugarnan unda hopi turista ta frecuenta.

No tin mucho mas detaye conoci. Esey ta motibo tambe pakico Marinierskazerne no por duna aprobacion pa e tubonan pasa riba su tereno, tanten cu no haya specificacion di Eagle LNG, algo cu no a sosode ainda.

Y awo nos a bin haya sa cu WEB Aruba N.V. mes tabata trahando ariba un plan pa uso di LNG. Ya expertonan di WEB Aruba N.V. a tene cuenta pa minimalisa tur e risiconan pa barionan residencial door di pone e tanki pa e gas banda di WEB Aruba N.V. mes na Barcadera. Lo a amplia waf di Barcadera pa e barconan di LNG por mara eynan y transporta e gas via tubo pa e tanki. WEB Aruba N.V. hasta a duna sesionnan di informacion (roadshows) den 2018 y 2019, pero lamentabelmente e plan aki a keda cancela den februari 2021.

Nos no ta contra LNG!!

Nos tamben ta mira e bentaha di LNG. Pero nos ta sumamente preocupa pa nos hendenan, nos casnan y nos barionan den caso cu e proyecto di e tubo di gas sigui den e forma cu Eagle LNG kier haci’e. Nos lo hasi tur cos cu ta na nos alcanse pa evita e tubo di gas pasa den zona residencial.

Un escape, un chispa y por surgi un explosion di 33 meter rond di e punto di explosion of riba un largura di 66 meter. Esey kiermeen cu henter un bario por disparse for di mapa cu consecuencianan enorme pa bida humano y propiedad. Es mas, Eagle LNG, riba su website, mes ta bisa cu na momento cu tin un escape di gas mester evacua un area di 100 meter. Con por haci esaki efectivamente si tin asina hopi cas rond di e tubo?

Nos ta un grupo di habitante preocupa di Balashi, Pos Chikito, Savaneta  y Cura Cabay cu kier pa Eagle LNG / Gobierno reconoce y garantisa nos derecho di por biba trankilo, sin miedo pa nos siguridad y sin cu ta perde balor di nos propiedad. P’esey ta urgi Eagle LNG / Gobierno pa instala e tanki di LNG na Barcadera, pa limita risico pa nos barionan. Esaki basa riba investigacion di nos mesun expertonan.