Minister Glenbert Croes: GOBIERNO TA TRAHANDO PA BRINDA MAS OPORTUNIDAD VIA ENSEÑANSA PA EMPLEO
“Den aproximadamente un luna lo anuncia e gran reapertura di e Enseñansa pa Empleo nobo, pa henter nos comunidad, nos hendenan, nos yiunan di tera y tur nos trahadornan por probecha di su cursonan
ORANJESTAD-Diamars ultimo, Minister Glenbert Croes a bishita e edificio di Enseñansa pa Empleo (EPE) pa mira e avance di e trabounan pa cu e facilidadnan nobo. Un EPE nobo na unda lo prepara tur esnan cu ta den necesidad di trabou of cu a perde trabou durante e pandemia pa por drenta bek e mercado laboral.
Manera ta conoci EPE a wordo funda na aña 1988 pa yuda tur esnan cu a perde trabou tempo cu Lago a cera su portanan na aña 1985. Mirando e necesidad den comunidad pa trabou e tempo ey, gobierno a bin cu e proyecto pa ‘her- en bijscholing’ di e hendenan cu no tabatin trabou. Asina EPE a wordo funda pa ofrece esnan cu mester a prepara pa un otro trabou, cursonan pa un ofishi nobo, entre otro den custruccion y den e industria hotelero. Actualmente Enseñansa pa Empleo ta ofrece un variedad di curso riba diferente nivel pa crea oportunidad pa nos comunidad den e mercado laboral.
E pandemia a causa un calamidad economico, poniendo Aruba den un situacion hopi mas dificil cu tempo Lago a cera. Pesey ta importante pa un biaha mas gobierno duna asistencia creando oportunidad na esnan den necesidad pa por siña haci otro tipo di trabou. E cooperacion di sector priva tambe ta di gran ayudo. Den e caso aki, Aruba Marriott Resort and Stellaris Casino a tuma e oportunidad pa apoya e cursonan y train esnan interesa pa fungi como dealer den casino. E interes pa cu e curso aki ta halto mirando cu hasta esnan cu ta traha como security ta interesa den bira un dealer den casino y gana un mihor salario.
Esaki sigur tambe ta di gran beneficio mirando tur e proyectonan hotelero cu tin andando. Minister Glenbert Croes ta sumamente satisfecho cu e trabounan na EPE, y ta gradici Aruba Marriott Resort and Stellaris Casino pa e apoyo cu nan ta brindando gobierno y e comunidad di Aruba en general. “Den aproximadamente un luna lo anuncia e gran reapertura di e EPE nobo, pa henter nos comunidad, nos hendenan, nos yiunan di tera y tur nos trahadornan por probecha di su cursonan” Minister Glenbert Croes a expresa.
