Minister Maduro tabata presente na e charla di Dr. Oswald Wever riba e Herencia Cultural y Genetico di e Arubiano
E stem di e Amerindio mester sigui resona pa por wordo scucha
Cu e meta pa laga e stem di e Amerindio wordo scucha, Dr. Oswald Wever a haci un investigacion na e herencia cultural y decedencia Amerindio di e Pueblo di Aruba. Den su buki ‘Cultural & Genetic Heritage of Arubans,’ Dr Wever ta comproba e lazonan estrecho cu tin entre Aruba y e Paisnan Hispano-Caribense, specialmente entre Aruba y Paraguana.
Na aña 2013 caba Dr. Wever a haci un investigacion genetico na e decedencia di e Pueblo di Aruba, ‘Genetic structure of the Aruban population, three origins,’ cu a comproba cu 54% di e Pueblo di Aruba ta di decedencia Amerindio. Dr Wever a sigui su investigacion riba e origin di e Arubiano y nos custumbernan y e resultado a keda presenta den e buki cu a keda lansa. Den e buki Dr. Wever ta comproba e relacion special cu Aruba tin cu Paraguana pa locual ta e lasonan familiar, custumber, cuminda, musica, etc. y esaki ta relata na e origin genetico Amerindio cu nos Pueblonan ta comparti.
Minister Maduro ta gradici Dr. Wever pa e investigacionnan haci riba e origin di e Pueblo di Aruba. E investigacionnan aki sigur ta lanta e curiosidad y ta acentua e necesidad pa mas aspecto di nos historia wordo investiga. E stem di e Amerindio mester sigui resona pa e por wordo scucha.
