Minister Glenbert Croes: ESFUERSO DI GOBIERNO PA BAHA AWA Y CORIENTE TA CONTINUA; REUNION CU MINISTER WOPKE HOEKSTRA TABATA POSITIVO
“Nos ta agradecido pa e forma con e mandatario a contribui y tende den discusionnan analysis di e temanan cu nos a trece padilanti”
ORANJESTAD-Minister di Labor, Energia y Integracion, Glenbert Croes a reuni cu Minister di Relacionnan Exterior di Hulanda señor Wopke Hoektsra riba diferente tema importante, principalmente e tema di energia. Pa Aruba e ta importante pa ricibi apoyo di gobierno di Hulanda pa Aruba por cana e caminda cu gobierno Mericano, pa cumpra combustibel pa WEB na un miho prijs. Esaki lo tuma lugar via companianan RDA y FMSA, cu e meta pa reduci prijs di awa y coriente pa comunidad di Aruba.
Minister Croes a expresa di ta contento cu e contribucion y comprension di Hulanda pa loke ta trata e tema di energia. Alabes a pidi e apoyo pa introduci Aruba na e multinacionalnan di hydrogeno na Hulanda pa asina Aruba por incorpora e compania di hydrogeno den e masterplan energetico pa e re-desaroyo di e zona di refineria. Esaki en bista cu tin dos Minister cu lo ta atendiendo un conferencia di Hydrogeno fin di November na Hulanda.
Unabes cu tin e capitulo di hydrogeno incorpora den e plan di energia nacional, gobierno lo haci e anuncio grandi na comunidad, pa loke ta trata e reactivacion di refineria y otro companianan, cu lo trece desaroyo grandi pa Aruba.
Segun Minister Glenbert Croes, e reunion a bay den bon atmosfera y tabata uno positivo. “Nos ta agradicido pa e forma con e la contribui y tende den discusionnan analysis di e temanan cu nos a trece padilanti” Minister Croes a expresa
