Partido MEP na Marisol Lopez Tromp
BO RETIRO TABATA LEGITIMO PASOBRA BO MES NO KIER A TRAHA PA UN SOLUCION.

SOLUCION.
Dia 28 di October 2021 Marisol a core entrega un laptop pero ainda nada di Ipad.

Partido MEP un biaha mas a tuma nota di intentonan di Parlamentario Marisol Lopez-Tromp pa troce e berdad tocante su retiro y e IPad cu e no a entrega nunca. P’esey ta importante pa recapitula kico a pasa cu a conduci na retiro di Marisol.

Diahuebs 15 october 2020 Parlamento a trata un mocion di desconfiansa contra Marisol. Apesar cu e mocion a wordo retira despues, hecho ta cu e fraccionnan den coalicion POR y MEP a retira nan confiansa den e minister.

Fraccion di POR a retira nan minister, pero e minister mes no kier a bay y esey a crea un problema pa Gabinete Wever-Croes 1. Den cualkier otro pais cu algo asina pasa, e minister ta tene honor na su mes y retira. Pero Marisol no tabata kier a retira. E stoel tabata demasiado dushi pe.

Mesora Minister Presidente a contact Marisol pa mira con lo sali afo di e situacion aki. Minister President a core su tras tres dia pa nan papia. Pero Marisol a core pe tur e tres dianan ey. Tabata obvio e ora cu Marisol no kier un solucion. E tabata tin problema cu Parlamento caba y awor a busca problema cu Ministerraad. Debi cu e situacion a bira “onwerkbaar” Ministerraad diaranson 21 di october 2020 a tuma e decision di retira Marisol.

Parlamento den su mayoria dia 22 di october 2020 a vota na fabor di e retiro y asina Gobernador a manda Marisol su landsbesluit di ontslag. Un procedura legitimo y segun tur regla.

SECRETARIADO DI MINISTERRAAD A MANDA UN CARTA OFICIAL
Diahuebs dia 22 di october 2020, Secretariado di Ministerraad a informa Marisol por escrito cu e mester entrega tur ekipo di su bureau. Marisol a neglisha e peticion ey y no a ni haci caso di dje.

Despues Marisol a ricibi mas recordatorio y na momento di prepara pa traspaso di Gabinete Wever Croes 1 pa 2, a manda Marisol un carta oficial atrobe dia 16 di september 2021, cu el a ricibi y firma voor ontvangst!

Ni asina Marisol no a haci caso di dje.
Dia 28 di october 2021, Minister Presidente a recorde den Parlamento cu nunca el a entrega e laptop ni e Ipad. Prome Marisol a nenga categoricamente. Despues, ora Minister Presidente a mustre cu e mes a firma voor ontvangst, e mester a admiti cu el a gaña un biaha mas!

MARISOL A CORE ENTREGA LAPTOP
E mesun dia ey, Marisol a core entrega un laptop pero ainda nada di Ipad.
Pues e sa cu ela horta e laptop y no a haci caso di ningun carta di Gobierno. Ta te dia Minister President a desenmascare den Parlamento, el a core trece un di nan.
Awor ainda falta e Ipad. Y tin potret cu ta prueba cu el a uza e Ipad como minister. Pues e sa masha bon cu e tin’e. Si e no tin’e mas, e mester a somenta mientras cu e mes tabata Minister. Talves el a duna su man drechi e Ipad pa nan core campaña cu tereno di huur?
Cualquier cu ta e caso, Marisol mester entrega e Ipad bek.

Si Gobierno entrega keho, e lo bay hunga rol di victima y bisa cu ta persecucion politico. Gobierno a scoge pa regla e asunto aki na forma trankil, y un biaha mas ta urgi Marisol, mescos cu bo a core entrega e laptop poco tempo ey, entrega e IPad tambe pasobra e no ta di bo!