Cft: “Percura pa aproba e presupuesto na tempo”

Philipsburg – Colegio di supervision financiero di Corsou y Sint Maarten (Cft) a urgi Sint Maarten den combersacionnan reciente pa aproba e modificacion di presupuesto di 2022 y e presupuesto di 2023 na termino cortico. E modificacion di presupuesto di 2022 ta inclui un suma di ANG 15,4 miyon na inversion, den cualnan Sint Maarten kier haci uzo di e suscripcion coriente di Hulanda. E inversionnan specifico ta contribui na un crecemento economico sostenibel. Ademas, e Ley di Reino di supervision financiero di Corsou y Sint Maarten ta indica cu Sint Maarten mester tin e presupuesto di 2023 aproba prome cu dia 15 di december 2022. E presupuesto aki mester ta balansa den servicio ordinario.

Economia di Sint Maarten a crece cu 8 porciento den 2021. Fondo Monetario Internacional (FMI) ta premira un crecemento economico di 7,5 porciento pa 2022. Recuperacion di turismo ta pa gran parti causa di e crecemento ey. Sint Maarten lo mester probecha di e recuperacion economico aki den e proximo añanan pa pone su finansa publico na ordo y cumpli cu su obligacionnan di pago.

Presupuesto 2022 y 2023

Na juni Sint Maarten a propone un modificacion di e presupuesto di 2022. Cu esey a reduci e deficit di servicio ordinario te na ANG 99 miyon. Ehecucion den 2022 ta mustra cu entrada y gasto ta desaroyando mas faborablemente. Conseho di Ministro di Reino a stipula recientemente cu pa 2022 ta permiti un deficit di ANG 40 miyon den servicio ordinario. Sint Maarten a ricibi na 2022 ANG 24 miyon na sosten di likides. Tambe Conseho di Ministro di Reino a indica cu na 2023 mester realisa un presupuesto balansa den servicio ordinario. Sint Maarten mester amortisa un prestamo di ANG 73,5 miyon na 2025. Ta p’esey ta di importancia pa e pais realisa surplus na 2024 y 2025. Segun e Ley di Reino di supervision financiero di Corsou y Sint Maarten mester tin un presupuesto aproba prome cu dia 15 di december 2022. Sint Maarten a indica cu lo entrega e proyecto di ley di presupuesto di 2023 na Parlamento mas lihe posibel pa por aproba e presupuesto na tempo.

Inversion

Den 2022 Sint Maarten a realisa por lo pronto gasto minimal den servicio di capital pa inversion. E modificacion di e presupuesto di 2022 ta inclui un suma di ANG 15,4 miyon na inversion, di cual ANG 10 miyon ta destina pa infrastructura di caminda. Inversion specifico den infrastructura ta contribui na crecemento economico sostenibel. Pa e inversionnan ey Sint Maarten kier haci uzo di e suscripcion coriente di Hulanda. Ta p’esey Cft ta urgi Sint Maarten pa aproba rapidamente e modificacion di e presupuesto di 2022 pa por cuminsa cu e procedura ey. Sint Maarten kier realisa inversion den 2023 y e añanan posterior tambe. Mester acopla e inversionnan den servicio di capital na e inversionnan financia for di e fondo fiduciario. Cft a urgi Sint Maarten pa bin cu un planificacion di inversion di mas aña y pa Sint Maarten, den caso di destaho, haci uzo di e experiencia cu Banco Mundial y cu e Oficina di Programa Nacional di Reconstruccion.

Aumento di entrada di impuesto

E entradanan di impuesto di Sint Maarten di aproximadamente 17 porciento di e Producto Interno Bruto (PIB) ta abou compara cu e standardnan internacional. Sint Maarten mester aumenta su entradanan di impuesto pa por genera surplus. Cft a conseha Sint Maarten pa acelera introduccion di un impuesto di casino y un impuesto riba volumen di benta di importacion priva di mercancia. Tambe Sint Maarten ta den e proceso di introduccion di un impuesto di alohamento riba huurmento di vivienda na turista. Durante e combersacionnan cu Ministro di Finansa y e Grupo Piloto di Transformacion Fiscal Cft a enfatisa cu modernisacion di e sistema fiscal y di e Departamento di Impuesto ta necesario pa mehora cumplimento fiscal.

Cuido di salud y seguridad social

Na 2022 Sint Maarten a dal e prome pasonan pa realisa economisacion den e sistema di cuido di salud. A hisa e limite salarial di seguro medico y seguro di accidente (ZV/OV) y ta implementando legislacion relaciona cu introduccion di remedi generico. Cu e Ministro di Salud Publico, Desaroyo Social y Labor Cft a discuti e reformanan planea y importancia di un pronostico plurianual realistico. Cft ta conseha Sint Maarten pa introduci e reformanan necesario pronto, pa asina reduci e deficitnan di e fondonan di cuido y evita cu e pais mester contribui structuralmente na e fondonan di cuido. Asina, por ehempel, e contribucion propio di empleado publico mester ta mas den liña cu esun di empleado den sector priva.

Maneho financiero

Sint Maarten ta tumando medida pa mehoracion di su maneho financiero y aprobacion di  e cuentanan anual. Sint Maarten a elimina e retrasonan relaciona cu e cuentanan anual y a sanea varios cuenta (intermedio). Na november 2022 lo aproba e cuentanan anual di 2019 y 2020. A finalisa revision di e proceso presupuestario y a corto plaso lo finalisa analisis di e procesonan di trabou financiero. Cft ta enfatisa importancia di implementa y garantisa e procesonan di trabou revisa mas pronto posibel. Asina por mehora e calidad di maneho financiero structuralmente. Ta spera di aproba e cuenta anual di 2021 na fin di 2022.

Dia 25, 26 y 27 di october 2022 e miembronan di Cft a hiba combersacion cu Gobernador, Conseho di Ministro, Ministro di Finansa, Ministro di Salud Publico, Desaroyo Social y Labor y Comision Financiero di Parlamento di Sint Maarten. Cft a hiba combersacion tambe cu e representantenan di e Grupo Piloto di Fondo Fiduciario pa Reconstruccion, di e Grupo Piloto di Transformacion Fiscal, di e Grupo Piloto di Maneho Financiero y di e Organo Ehecutivo di Seguro Social y Seguro Medico.