Mensahe di Minister Glenbert Croes pa Dia di Betico
Riba 25 di januari 1938 nos Libertador a nace. E tempo ey ainda ningun hende tabata sa cu tabata poni den su destino cu Betico lo ta e gran Lider di nos pueblo pa realisa su Libertad. El a skirbi historia di nos Pais. El a skirbi historia di Reino Hulandes unda cu el a logra pa Aruba bira pais den Reino Hulandes, hayando su Status Aparte.
Awor nos mester saca fruto di recorda su memoria. Pakico nos ta corda y recorda, balora e memoria di lucha di Libertad y bida di nos Libertador? Pa e historia cu nos cada un como conciudadanonan mester skirbi den nos propio bida: con nos ta bay duna balor na nos propio bida, con nos ta bay duna balor na nos propio historia y con esaki por contribui na e desaroyo, progreso, felicidad y bienestar pa nos Pais y henter nos digno pueblo di Aruba. Esey ta e gran reflexion cu nos mester haci.
Riba Dia di Betico laga nos probecha e dia aki pa comparti cu otro, record’e. Cu su memoria inspira nos den nos propio caminda di bida y asina yuda nos cada un sigui haci Aruba miho, mas grandi, mas positivo, mas prospero, mientras nos ta saliendo di momentonan dificil di entre otro e pandemia. Ban keda rindi tributo grandi na un homber cu a sacrifica su bida pa e Libertad di Aruba y pa nos balora su sacrificio, honrando e Libertad cu nos propio ehempel, cu nos propio conducta, cu nos propio amor, cu nos propio compromiso. Laga e amor patrio cu a gui’e pa lidera nos Pais, laga riba un dia manera awe, laga nos amor pa Aruba guia nos pa nos por contribui na hiba Aruba den un miho rumbo.
Feliz Dia di Betico na henter digno pueblo di Aruba.
Glenbert F. Croes
