Partido MEP na Miguel Mansur:
MIYONARIO MIGUEL MANSUR: BAI PAGA BO DEBENAN

Den un comunicado cu parlamentario miyonario Miguel Mansur a publica, e ta declara cu e ta un miyonario malcria y arogante.

Despues di inhustamente ataca un parlamentario di MEP directamente, pa un articulo cu partido MEP a publica, miyonario Mansur ta declara di su mes cu e debe matutino Diario 10 mil florin.
Miyonario Mansur a declara cu ta e mes a dicidi di no paga su debe di campanja.
No pasobra e no tin e placa, pasobra e mes a declara cu e tin hopi mas cu esey y 10 mil florin e no ta falta.
Pero e mes ta dicidi di no paga su debe pasobra e tin rabia riba e matutino y hasta e ta insulta e propietario publicamente.
Na forma arogante miyonario Mansur ta admiti cu e ta un mal pagado.

Ta obvio cu a base di e leynan nobo di screening y integridad miyonario Mansur hamas lo por bira un gobernante di pais Aruba. Pasobra un hende cu ta broma cu 10 mil florin no ta nada p’e, mesora ta bira un “redflag”. Ta interesante pa sa di unda ela haya asina tanto placa.
Ta bira tempo pa e ley di screening y integridad wordo aplica pa parlamentario tambe. Na momento cu mester screen parlamentario mescos cu ta screen minister, partido MEP ta sigur cu no ta parlamentario di oposicion Benny Sievinger so mester sali for di Parlamento, sino varios lider di oposicion lo mester sali parew cune.

Finalmente partido MEP ta enfatisa: partido MEP ta paga su debenan y no ta depende di sponsor door di media. Mayoria di media ta contra partido MEP, pero esey no ta stroba partido MEP di sigui informa comunidad y desenmascara politiconan sinberguensa cu no ta paga nan debenan!