Lider di Partido (MEP): ‘DANKI PA BOSO LEALTAD Y SOSTEN STABIEL NA NOS PARTIDO’

ORANJESTAD – Diadomingo a tuma luga congreso di partido MEP pa aña 2022 “Un Aruba, Un Lider”. E actividad a bay den bon ambiente familiar, cu animacion y entretenemento pa henter famia. Na e ocasion Lider di Partido MEP Evelyn Wever – Croes a tene un discurso den cual a gradici cada un sostenedor di partido durante 51 añanan di existencia di partido.

“Danki na boso tur pa bo lealtad y sosten stabiel na nos partido, pa 51 aña den union manera un gran famia; cu bon conseho, cu critica constructivo y oracion. Danki pa bo pasenshi y danki pa bo sosten y confiansa na mi persona como lider di MEP. Mi lo traha duro pa no defrauda e confiansa aki.”

Lider di partido Evelyn Wever – Croes a sigui gradiciendo coleganan candidato di partido, pa nan sacrificio y compromiso na Aruba. Tambe na henter su famia, pa compronde e sacrificionan cu e responsabilidad aki ta trece cune, y pa semper tey.

HISTORIA DI LIDERNAN DI MEP
Partico MEP a conoce dos lider grandi den pasado, sr. Betico Croes den feliz memoria, fundador di partido, cu a lidera partido MEP y Pais Aruba pa 15 aña. Sr. Betico Croes hunto cu miembronan di e prestigioso partido MEP a lucha pa realisa e deseo di nos pueblo di ta para riba propio pia. El a entrega nos e yabi di e hogar cu yama Pais Aruba, pa nos lanta nos yiunan y nan yiunan riba un pais autonomo. E mes lamentablemente no a biba pa mira esaki wordo realisa, pero di caminda e ta, indudablemente e lo ta hopi orguyoso di e pais cu ela construi, di e partido cu ela funda y sigur di su hendenan balente y orguyoso, Lider di Partido Wever – Croes a expresa.
Despues di fayecimento di Betico Croes, sr. Nel Oduber MEP su lider honorario a tuma rienda di e partido, y Nel tabata tin e tarea grandi di lanta e partido bek. Un corant e tempo ey hasta a skibi “BETICO DOOD, MEP DOOD”, insinuando cu e morto di Betico kiermen e morto di MEP. Pero Nel a demostra lo contrario. Na un forma determina y cu curashi Nel a lidera nos partido pa 25 aña, y e tabata 4 biaha Minister President di nos pais. Nel a lidera gobiernonan di ministernan di MEP cu a percura pa Aruba para riba propio pia, economicamente y financieramente. Cada biaha despues di un periodo di gobernacion serio di MEP, e tabata laga e cama drecha pa e otro partido reboltea cos. Pero mescos cu despues di cada tempestad solo ta sali, asina e gobiernonan di MEP cada biaha a percura pa drecha e mal maneho di e gobierno anterior.
Lider di partido Evelyn Wever – Croes, a sigui splica cu 11 aña pasa a toca su turno pa sigui den paso di e dos lidernan di mas grandi di nos partido y di Aruba. Un tarea y responsabilidad hopi grandi, pasobra e sapatonan cu nan a laga ta hopi grandi pa yena. Esaki no tabata facil pero hunto cu coleganan candidato di partido, y hunto cu sostenedornan, a lora manga y traha pa fortifica e partido. Y ta cu hopi orguyo awe por bisa cu partido MEP ta e partido di mas stabiel y di mas grandi di Aruba un biaha mas!

GOBERNA DEN TEMPONAN DIFICIL
Partido MEP ta den gobierno awor pa 5 aña, e 5 añanan mas dificil den historia moderno di henter mundo. Sinembargo mester bisa, den tur humildad, cu nos gobierno, nos ministernan di MEP ta haciendo un tremendo trabou. A pesar di e lama bruto, a logra mas cu 250 proyecto y ta bringando varios crisis pareu. E crisis di pandemia mundial Covid ainda, y e crisis di inflacion causa pa e guera cu Rusia a cuminsa na Ukraina.

“Mi ta garantisa cada un di boso, cu mescos cu nos a enfrenta e crisis di pandemia, y nos a saca Aruba for di su gara, asina tambe nos lo enfrenta e crisis di inflacion y nos lo saca Aruba for di su gara tambe!,” No mester tin miedo. Aruba y nos partido a pasa den temponan peor, y nos forsa semper tabata e union. Si nos ta uni, nos ta mucho mas fuerte pa enfrenta tur reto y obstaculo cu crusa den nos caminda. Mi ta pidi boso pa nos keda uni, manera un gran famia, pa sostene y apoya otro.

Finalmente Lider di Partido MEP Evelyn Wever – Croes a expresa na tur sostenedor: “Ban keda positivo, ban keda sostene nos partido, ban keda lucha, pasobra Dios tin planes grandi cu Aruba. Aruba ta bendiciona. Loke nos mester hasi ta keda positivo y tin Fe. Fe cu e trabou duro y e sacrificio grandi cu nos ta hasiendo, lo trese progreso y bienstar pa nos, pa nos yiunan y nan yuinan.”