Parlamentario Marco Berlis (MEP):
CLARIFICACION DI E PONENCIA DI CAFT RIBA E POST DI GOEDEREN EN DIENSTEN.

Den un di e rapportnan di CAFT, e ta menciona cu gobierno mester baha e post di Goederen en Diensten na e nivel di aña 2020, cu ta 43 Miyon menos. Mi a observa con AVP kier troce e berdad tocante di esaki recientemente. Esaki ta otro maniobra di AVP pa busca momentum politico den un tempo di crisis cu pandemia a trece. Parlamentarionan ta representante di pueblo y tin e deber di informa pueblo cu honestidad, sinceridad y cu e motivacion corecto. Pesey mi kier splica pakico pueblo no mester cay pa e campaña di desinformacion di AVP. E ta importante pa pueblo di Aruba compronde e scenario real cu pais Aruba a pasa y ta pasando aden. Pesey permitimi splica tur cos na placa chikito pa pueblo por conoce e berdad di e asunto aki, stap pa stap.

• Na 2014 CAFT a haci su entrada na Aruba, pa via di e maneho financiero desastroso di AVP, cu a haci cu Hulanda mester a bin interveni. A endeuda pais Aruba di un forma catastrofico, di un manera nunca antes bisto. Hulanda a categorisa esaki desastroso y a manda CAFT supervisa y hunto cu AVP, a cuminsa propone y impone medidanan pa nos pais. CAFT por lo tanto, no a bini pa via di placa presta di pandemia, sino a haci entrada na 2014 bao gobierno di AVP.

• Na Maart 2020 Covid-19 a yega Aruba y pa e tempo ey niun experto na mundo tabata sa con mortal e virus tabata ta, mundo henter tabata den crisis, Y hopi informacion inconsistente tabata sali di WHO, cu tampoco tabata sa kico pa haci. Nos por corda cu pa hopi tempo WHO tabata contradeci su mes masha hopi mes, den su consehonan cu tabata cambia cada rato.

• Ora cu cu e virus a cuminsa propaga aki na Aruba, empresanan y gobierno tabata manda esnan contagia den cuarentena. Y hopi liher e virus a plama tur caminda y Aruba a bay den un lockdown severo pa basta luna y tur actividad gubernamental, comercial, economico y social a wordo cancela.

• E cancelacion di actividadnan publico a haci cu no tabata haci uso di e recursonan y gastonan operacional. Esaki a sosode pa varios luna. Y ora cu a cuminsa traha bek, a cuminsa haci’e gradualmente y cu masha hopi hende trahando for di cas. Den e momento ey di nos historia den e pandemia, scolnan y hopi profesionalnan tabata traha for di cas. Esaki a haci cu e gastonan normal di Goederen en Diensten tabata riba un minimo. Esaki naturalmente a produci un cifra di gasto di Goederen en Diensten na 2020, cu tabata hopi mas abao cu usual. Esaki ta algo logico, y mester tene cuenta cu ne pa compronde e cifra di Goederen en Diensten di 2020. Ta pesey gobierno, no ta di acuerdo cu e ponencia di CAFT pa reduci e presupuesto di e post Goederen en Diensten 2022 na nivel di 2020, pasobra technicamente esaki ta imposibel.

Awor cu Aruba ta den recuperacion, pais Aruba mester su recursonan bek y ta pa e motibo aki nos por wak tambe cu e cifra di Goederen en Diensten a subi bek na un cifra cu ta mas realistico y comparabel cu añanan di gobernacionan anterior.

Ta pa e motibo aki e ta straño, cu durante cu e pandemia a asota nos pais y e mundo, no a scucha e bos di e lider di AVP mes! Pa hopi tempo e no a aporta, yuda, ni sugeri con lo por a yuda nos pais y ni a preocupa pa ta solidario den e pio crisis den historia di Aruba. Ta probablemente e no tabata sa kico pa haci ni tabata tin un solucion pe crisis. Ta zona manera cu 2014 a ripiti su dilanti un biaha mas! El a tuma un minister president fuerte, Evelyn Wever-Croes hunto cu su ekipo, pa para tuma decisionnan na bienestar di pueblo henter, pa scapa bida y despues cuminsa bek cu e reconstruccion di nos economia y pais.

Loke nos mester ta un politica nobo, fresco, honesto, cu no solamente ta tuma tempo pa ta critico, pero cu tambe ta solidario den momentonan di crisis di nos pais y cu ta traha pa presenta y vocifera solucionnan concreto pa nos pais Aruba. Nos mester cambia nos mentalidad, pa por reconoce cu haci politica sushi den crisis, ta manera kita pan di un pober. Esaki ta exactamente loke AVP a bini ta haciendo. Permitimi splica;

Un caminda si, unda lider di AVP y su fraccion a laga nan bos resona durante e crisis di Aruba, tabata ora cu nan a traiciona e pueblo di Aruba den nan peor momento. Esaki tabata ora cu mester a vota pro of contra e ley di FASE Y LOONSUBSIDIE, unda fraccion completo di AVP bao liderasgo di nan lider, a vota encontra! Asina nan a bandona 1800 doño di empresa, 3000 persona cu a cobra Covid bijstand, y 30.000 hende cu por a come durante pandemia. Mi ta spera cu HAMAS pueblo lo lubida esaki! Esaki ta mustra e berdadero curason di AVP: “Nan no tin nos pais na pecho y no ta interesa den nos pueblo, ni den su dolor. Nan ta enfoca solamente riba nan ambicion. Hopi show y nada di compacion. Hopi palabra, rueda di prensa, pa desinforma pueblo pa nan por sigui instiga y troce e berdad. Nan draaiboek y agenda ta pa bin na poder! Pasobra, ora cu AVP a haya e oportunidad di ta solidario den e pandemia, ora nos pueblo tabata sufriendo bao e presion financiero, den pleno crisis y desesperacion, partido AVP kier a manda Aruba completo den pobresa, pa ganashi politico. AVP, a vota contra bo pan, contra bo trabao, contra bo progreso y contra bo empleo. pueblo nunca lo pordona bo traicion!