Parlamentario Alvin Molina (MEP):

Awo un papel di 5 florin lo costabo 10 florin

Ta berdaderamente hopi tristo, di basta tempo caba Hulp Bestuurskantoor San Nicolas ta den un estado deplorabel. Servicio cu ta wordo duna na comunidad di San Nicolas ta hopi limita. Awo a yega asina leu cu e mester a wordo cera. Mi ta compronde cu el a wordo cera paso ta toca un problematica di siguridad tanto pa e trahadonan y siguridad pe cliente. Ta hopi tristo y ta lamenta cu esaki mester a sosode. Di tur e MFA cu a wordo traha na Aruba, e edificio di San Nicolas ta un di nan cu mester a wordo traha prome. Tabatin un presupuesto disponibel pa tur 5 MFA y na final di dia net esun di San Nicolas no a wordo traha, door di un mal maneho.

Na luna di april ultimo durante tratamento di e presupuesto 2022 mi a entrega un mocion unda mi a urgi gobierno pa duna atencion na Hulp Bestuurskantoor di San Nicolas, pa un dia e bira un MFA completo pa asina e pueblo di San Nicolas tambe ta mas cerca di cas pa cu Censo y Belasting. Consecuencia di a cera di Hulp Bestuurskantoor ta cu un papel di 5 florin awo ta bay costa bo 10 florin, paso bo mester paga bus pa bay bin bek. Otro siman Parlamento di Aruba ta trata presupuesto 2023 y sigur mi lo trece mi mocion dilanti atrobe y puntra Gobierno kico ta e causa cu e Hulp Bestuurskantoor ta den estado deplorabel, no solamente e servicio tabata minimal pero cu a yega na e punto cu mester wordo cera. Mas importante pa sa kico ta bay ta e solucion y riba ki termino.