Invitacion pa mayor y muchanan:
Comision Celebracion Dianan Nacional hunto cu Minister di Cultura Maduro a anuncia:
Sinterklaas y Pietnan di color ta yega Aruba diadomingo 13 di november pa 10 or di mainta
Durante un conferencia di Prensa na Aruba Bank situa na Camacuri, Minister di Cultura Xiomara Maduro hunto cu Comision Celebracion Dianan Nacional a anuncia cu Sinterklaas y su Pietnan di color lo yega Aruba diadomingo 13 di november proximo.
Ta pidi tur hende pa yega tempran, e porta di Harbour Arena lo ta habri for di 9 ‘or di mainta y ta spera e yegada di e boto pa 10 ‘or di mainta. No lo permiti autonan drenta Harbour Arena. Minister di Cultura lo duna Sinterklaas y su Pietnan bon bini na Aruba. Despues lo sigui cu un parada cu lo inicia na e rotonde dilanti Harbour Arena subi L.G. Smith Boulevard direccion pariba y lo drenta Oranjestraat y ta termina riba Plaza Padu.
E parada ta wordo acompaña pa Quality Brassband, Truck cu Coro di Muchanan Sabi bou direccion di Edselyn Figaroa kendenan lo canta cancionnan nobo dedica na e temporada.
Jeff Classic Tours su school bus lo tin JJ di Cocomelon y otro personahenan di Disney pa muchanan saluda y saca potret.
Riba Plaza Padu, “Tan Tio”, forma pa Tanchi Esmee y Tio Georgo lo entrene e publico cu show, baile y wega. Disney Recreations ta encarga setup up Dino Jump, Carousel, trampolín pa e muchanan por disfruta di un bunita celebracion.
Comision Celebracion Dianan Nacional ta gradici Ministerio di Cultura, Departamento di Cultura, SETAR, ARUBA BANK, UNOCA y demas Departamentonan di Gobierno y tur esnan cu ta cooperando pa haci e celebracion aki uno grandi y special pa nos muchanan.
