Parlamentario Marco Berlis (MEP):

Un mainta di inspiracion riba beroependag na John Wesley College

Un bunita dia informativo pa tur studiantenan cu por a scucha hende di diferente sector comparti nan experiencia

Diabierna mainta October 28, for di 7:45am te cu 10:00am, John Wesley College na San Nicolaas a organisa un Beroependag informativo pa tur nan studiantenan cu por a scucha profesionalnan di diferente sector comparti nan experiencia. Cada un di nos a comparti nos experiencia di studio, trabao, y profesion actual. En total a duna informacion na klas 1,2 y 3 den sessionan di 45 minuut. Aki nos por a comparti y motiva e studiantenan pa nan prepara nan mes pa identifica kico nan lo kier studia pe den futuro pa asina nan cuminsa considera cual profiel nan lo kies na scol. A encurasha tur studiante pa siña enfoca riba nan studio, keda determina y persevera pa alcansa nan soñonan.

Adicionalmente mi a duna un splicacion kico un parlamentario ta haci, kico ta su trabao, cual ta su debernan, cu kico tur e ta ocupa su mes y mi a siña nan di Trias Politica. E muchanan mes tabata participa activamente. Nan tabata tin diferente comentario y pregunta riba diferente area y mi a tuma e tempo pa contesta esakinan debidamente. Na final a saca algun potret y despues cu tur 3 clas, maestra y invitadonan hunto. A ser entrega un regalo bunita na cada invitado pa nan participacion cual nos a tuma cu masha aprecio.

Mi a invita e cabesante di John Wesley pa considera bin cu e muchanan na Parlamento pa asina nan por experiencia esaki personalmente, y unda cu nan por conoce coleganan y haya mas informacion. E Tabata un privilegio pa por a pasa algun ora cu e muchanan y mi ta gradici John Wesley College pa e invitacion pa por a participa den e Beroependag.

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!