Firmamentu di Memorandum
of Understanding pa estudio di dosente na Saba i Sint Eustatius
Riba djabièrnè 4 di novèmber Ministerio di Edukashon, Kultura i Siensia pa region Karibense, University of St. Martin (USM) i University of the Virgin Islands (UVI) di manera festivo a firma un Memorandum of Understanding pa formashon di dosente pa Saba i Sint Eustatius. Ku esaki e tres institutonan a konfirmá nan kolaborashon pa ofresé e ‘Bachelor of Education BAE’ na Saba i Sint Eustatius.
E programa di formashon na nivel di Bachelor ta prepará studiante pa e fishi di dosente den edukashon primario. USM lo ofresé e estudio rekonosé internashonalmente den kolaborashon ku UVI. USM a risibí e enkargo di Ministerio di Edukashon, Kultura i Siensia (OCW) pa ofresé e estudio na asistèntnan den edukashon na Saba i Sint Eustatius. Ku esaki OCW ta proveé den e nesesidat riba e islanan pa dosentenan eduká lokalmente den edukashon primario. E tarea ta resultado di e asina yama “Samenwerkingsprotocol op lerarenopleidingen in het Caribisch deel van het Koninkrijk der Nederlanden te stimuleren 2019-2025”. Durante e Vier Landen Overleg na 2019 e kuater ministernan di Edukashon di Sint Maarten, Aruba, Kòrsou i Hulanda a firma e akuerdo aki.
Ku un komunidat ku ta papia prinsipalmente Ingles i ku Ingles komo idioma di instrukshon na skol, un programa di formashon na Ingles ta nesesario. USM ya pa 20 aña kaba ta ofresé e programa aki. Ademas, USM a desaroyá i ofresé kursonan relevante, manera Historia i Kultura di Sint Maarten, un kurso obligatorio pa tur studiante di universidat. Huntu ku e direktivanan di skol i ekspertonan lokal di Saba i Sint Eustatius e fakultat di USM lo desaroyá un kurso di historia i kultura di kada isla. Esaki ta bira un materia obligatorio pa e programa di formashon. Dieskuater asistènt den edukashon ta inskribí pa inisiá e estudio na yanüari 2023.
Siguiendo e protokòl dia 2019 USM, huntu ku universidatnan den region, a partisipá aktivamente den lanta e kolaborashon Kibrahacha, ku e meta pa Huntu Eduká i Profeshonalisá na Aruba, Boneiru i Kòrsou. Partnernan lokal ta spera ku e Memorandum of Understanding ku a firma djabièrnè lo fortalesé e relashonnan den Reino i institutonan di enseñansa i direktivanan di skol i trese mas union den e desaroyo di edukashon den siglo 21 den region Karibense.