BRA A DEMOSTRA WORLD BANK E CAPACIDAD DI ARUBA PA RESPONDE DEN CASO DI CALAMIDAD

Den cuadro di conferencia tocante preparacion y resiliencia den caso di disaster

ORANJESTAD – siman pasa a tuma luga un conferencia organisa pa World Bank y otro organisacionnan internacional, den cual a trata e tema di preparacion y resiliencia di paisnan den region di Caribe den caso di calamidad of disaster y capacidad financierp pa atende cu esaki. Bureau Rampenbetsrijding Aruba (BRA) a atende e conferencia aki como parti di e delegacion di Aruba y como e instancia cu tin e responsabilidad pa prepara Aruba den caso di cualkier disaster. Den cuadro di esaki a tuma luga un excursion pa cual BRA a prepara un “Tier-2 commanding control” pa World Bank por haya un bista di e capacidad cu Aruba tin te cu aworaki pa responde den caso di un incidente.

Director di BRA Rino Hermans a splica cu a prepara e setup cu ta yama “Tier-2 commanding control” cual ta wordo uza den caso di un incidente grandi. A scoge Santa Rosa pa realisa e setup pa asina esnan di World Bank  por wak e capacidad cu Aruba tin te cu aworaki pa responde den caso di un incidente grandi. E setup ta tuma luga den 40 minuut pa ta operacional y cu por atende victima. Sr. Hermans a sigui splica cu Manera cu ta conoci, Aruba su economia ta chikito. Esaki ta haci cu mas lihe cu por recupera for di un incidente ta mas lihe e economia ta cuminsa daai.

“Mi ta kere cu esnan di World Bank lo keda impresiona di e capacidad cu Aruba tin te cu aworaki basa riba propio forsa. Awo nos ta bay negocia di kico mas nan por sostene Aruba cu ne, pa por sigui fortifica nos capacidad logistico. Pa Aruba por responde y recobra economia hopi mas liher den caso di cualkier evento grandi cu sosode cu ta impacta nos mobilidad,” sr. Hermans a termina bisando.