Minister Maduro a hiba palabra na despedida di Ruben ‘Scorpio’ Garcia

Bon dia na tur presente. Awe henter Aruba ta di luto, for di diahuebs pasa cu Aruba haya e noticia cu nos Ruben Luis Garcia no ta cu nos mas, ta reina un enorme tristesa na Aruba. Tur cos a para un rato keto y e atencion tabata riba e noticia cu Aruba a perde un eminencia, un gran legendario. Rednan social tabata yen cu palabranan di danki pa recuerdonan, experiencianan bunita y palabranan di sosten na su famia, mensahenan di pueblo di Aruba, for di nos islanan ruman y tambe otro partinan den exterior. Na e momento cu e noticia a drenta, un profundo tristesa a reina den nos comunidad y mesora a realisa cu nos a perde un otro legendario, cu a laga un tremendo bashi aki na Aruba. Durante e ultimo dianan aki nos por a sinti cu e amor cu Aruba tin pa Ruben ta inmenso y esaki ta wordo confirma tambe awemainta na su despedida.

Ruben ta un icono di alegria na Aruba cu mas cu 50 aña den radiodifusion y farandula. Cu su programanan na radio, television e tabata drenta tur skina na Aruba cu su tremendo voz. Riba tarima e tabata sa di dirigi tur tipo di evento, un tremendo Maestro di Ceremonia. Como promotor ela laga Aruba cera conoci cu hopi artista y bandanan internacional. Su voz tabata wordo uza como branding pa companianan renombra. Den temporada di Carnaval y Pasco semper Ruben tabata tey cu su programanan tan popular. E tabata e motor tras di e Jingle di Carnaval y henter comunidad  tabata disfruta di e manera unico cu Ruben tabata sa di trece ambiente ora di lansa e slogan pa apertura di Carnaval. 

Ruben tabata un persona, cu ora bo tope, tabata yena bo curason cu e alegria cu e tabata vibra. E mesun energia e tabata contagia pueblo di Aruba cune atraves di su microfono. Un persona cu su ‘jokenan’ y cu nomber di cariño pa tur hende. Na bon Papiamento un ‘dushi hende’ pa trata cune. Ruben tabata stima cu casa Treesje masha hopi mes y tabatin un amor grandi pa su famia. E tabata orguyoso di su Pais Aruba y tabata stima nos hendenan. Ruben a sostene y promove nos cultura na tur momento.  Semper e tabata disponibel pa cualkier conseho na artistanan cu ta inicia nan carera y atraves di su programanan e tabata yuda promove tur nos artistanan y eventonan riba nos Pais. Tambe e tabata yuda promove artistanan cu tabata bini for di exterior atraves di su programanan. Hopi artista di exterior, especialmente di nos islanan ruman tin masha aprecio y ta masha agradecido na Ruben ‘Scorpio’ Garcia. Ruben tabata un tremendo persona, locutor, animador, promotor y maestro di ceremonia y cu hopi carisma.

Cu e talento cu Dios a duna Ruben, e tabata informa y trece ambiente y alegria den tur cas.  Ruben tabata uza su microfono pa trece mensahenan positivo, pa inspira, motiva nos comunidad y mas importante ainda pa corda un y tur pa keda gradicido na y confia den Señor. Den un entrevista den un programa riba red social cu Ruben tabatin ultimo, ela comparti e siguiente mensahe:

‘Bida ta e cos di mas bunita cu bo tin, mester celebre tur dia, sinti bo contento, biba cu emocion y ta gradecido na Señor. E ta un regalo cu nos tur tin’.

Laga e mensahe cu Ruben a laga aki, biba den cada un di nos. Un mensahe pa nos disfruta bida cu alegria y gradici Señor semper pa cada dia di nobo.

Mi ta sumamente contento cu dos aña pasa, den temporada di COVID, mi persona por a bishita Ruben na su cas, sin previo aviso y asina sorpres’e y brind’e un homenahe, un reconocemento na nomber di Gobierno y pueblo di Aruba, en conexion cu su conmemoracion di 50 aña den radiodifusion, informando, entreteniendo y treciendo alegria den nos pueblo. Momento durante cual nos tabatin e oportunidad, ora e tabata na bida, pa gradici’e pa tur locual e la haci pa su baranca stima. Nos a pasa un rato ameno cu Ruben hunto cu su famia.

Ruben, Obenchi, Scorpio, Tio, Tio Ruben, Dakotero, un bes mas masha danki pa tur e alegria cu bo a trece cerca cada un di nos atraves di bo voz y bo programanan. Manera Ruben tabata yama su mes, Aruba su cocada kima, Aruba su raspadura, danki pa tur bo cooperacion pa yuda nos promove nos cultura. Danki pa Biba Nos Cultura. Danki pa stima nos Pais y nos tur. Bo “Power Sensation” lo keda semper den nos mente y curason.

Unda cu bo ta Ruben, sa cu bo fanaticonan y henter pueblo di Aruba ta aprecia tur locual bo a haci durante bo biahe riba e mundo aki.  Den nos curason nos lo keda corda bo cu e alegria cu bo sa di transmiti. Ruben, pueblo di Aruba stima bo y lo sinti bo falta masha hopi mes!

Na nomber di Gobierno di Aruba, mi ta extende mi mas profundo sentido di pesame y forsa na su casa Treesje, na yiunan Genevieve, Gilliene, na su yerno Darcy, nietonan Antron y Abrianny, su rumanan, sobrino y sobrinanan, famia Garcia, famia Marchena, su coleganan di Power Radio, demas famia, amistadnan, conocirnan y Aruba completo. Nos lo keda recorda Ruben den nos mente y curason.

Aworaki ta un momento masha special, pa nos pensa un rato asina’ki riba nos Creador y nos bisele DANKI, masha danki mes di por a duna nos e oportunidad aki pa por comparti e mundo bunita, p’e hende maraviyoso durante e ultimo 10 oranan cu a transcuri y na mesun momento pidiendo su bendicion p’e siguiente 14 oranan awe. Cu Dios bendiciona nos bunita Pais Aruba y su hendenan. Nos ta pidi bo Tata pa brinda Ruben Luis Garcia un bunita lugar den bo brasanan. Na nomber di Tata y di Yiu y di Spirito Santo. Amen.

Ruben, descansa na paz!