Minister Rocco Tjon:

𝐓𝐀 𝐁𝐀𝐘 𝐈𝐍𝐈𝐂𝐈𝐀 𝐒𝐈𝐌𝐀𝐍 𝐃𝐈 𝐋𝐀𝐍𝐓𝐀𝐌𝐄𝐍𝐓𝐎 𝐃𝐈 𝐌𝐔𝐂𝐇𝐀

ORANJESTAD – Mundialmente, dia internacional di mucha ta wordo conmemora riba e fecha di 20 di November. Na Aruba esaki no ta diferente, pero loke si ta diferente ta cu na aña 2018, Gobierno di Aruba a introduci pa prome biaha e “Siman di lantamento di mucha”. E siman aki ta wordo conmemora anualmente y ta encera un siman den cual ta pone enfasis riba con ta lanta muchanan na un manera positivo, pa nan por desaroya te cu nan maximo potencial. E ta un siman yena cu actividadnan pa mayornan y nan yiunan. E aña aki ta e prome lustro, pues ya caba ta di 5 aña cu ta organisa esaki, cual no ta un esfuerso di parti di Gobierno di Aruba so, pero tambe di  diferente organisacionnan no-gubernamental.

Segun Minister di Husticia y Asuntonan Social Rocco Tjon, hopi biaha nos ta papia di e problema so, sinembargo e siman aki tin un caracter preventivo pa asina netamente evita problemanan. Lantamento di un yiu no ta un tarea facil, un yiu no ta bin cu un manual, y ademas di esaki cada mucha ta diferente, cual sa ta un reto pa mayornan dicidi cua ta e miho manera pa lanta nan yuinan. Na Hulanda un siman asina ta yama “Opvoedweek”, y den cuadro di derechonan di mucha, tur pais den Reino Hulandes, a compromete nan mes pa declara un siman asina tambe den nan pais. Nos meta, anualmente, ta pa refleha riba e tarea intensivo di mayornan den lantamento di nan yiunan .

E aña aki Aruba lo celebra e siman di lantamento di mucha for di 13 pa 20 di November. E siman aki ta posibel danki na e trabou intensivo di e Comision Vision Pedagogico cu ta consisti di Centro Hoben y Famia, Wit Gele Kruis, Fundacion Pa Nos Muchanan, Fundacion Respeta Mi y Tienda di Educacion. Banda di esaki, tambe tin diferente otro organisacionnan cu ta sostene e vision pedagogico di Aruba cu ta pone enfasis riba lanta muchanan di un forma positivo.