Parlamentario Alvin Molina (MEP):

Derecho di un ambtenaar mester wordo respeta

Gobierno y su ambtenaarnan mester duna un bon servicio na pueblo di Aruba. Pueblo merece esey. Di otro banda nos ta mira cu tin demasiado caso di ambtenaar cu no ta wordo aprecia pa nan esfuersonan, mayoria eventualmente ta wordo gana door di e ambtenaar.

Den casonan asina solamente tin perdedor. E ambtenaar ta perde cen, tempo y motivacion. E departamentonan y DRH ta gasta oranan por nada. Pueblo ta perde hopi placa cu ta wordo gasta na e casonan aki.

Por ehempel, cu su permiso, mi ta trece dilanti e caso di onderinspecteur Tony Yearwood. Un polis hopi conoci, keri, respeta den comunidad, cu 35 aña ehemplar di servicio. Tony tin casi 5 aña “letterlijk” luchando pa su bida, bayendo ariba abou pa Colombia, operacion tras di operacion. Cancer den su garganta, causa door di schimmel den e warda di polis bieu na Wilhelminastraat. Testnan a indica cu tin schimmel tiponan peligroso eyden. Docternan a bisa cu e schimmel ey por causa cancer. Tres polis a haya e mesun cancer den garganta aki, 4 polis a haya cancer di tripa, un otro a haya cancer di sanger y weso. Tur a traha den e mesun edificio na Wilhelminastraat.

Tony cu su 35 aña di servicio mester ta focus riba su funcion, liderando su districto, guiando su coleganan jong cu su experencia y conocemento. Na luga di esey e mester perde su tempo, consumi su curpa, haciendo su mes mas malo, bringando pa su derecho pa “bevordering”, door di un “dienstongeval”. Con esey ta posibel! E mes tin e boluntad pa uza e salud asina valioso cu el a lucha pe, na servicio di su pais. E merece di ricibi e mesun servicio y honor ey bek. No laga hende honesto y trahado keda insatisfecho.

Mi ta contento cu nos Minister di Husticia na varios ocasion ta demostra cu e tin “bedrijfsvoering” halto riba su lista di prioridad. Mi lo sigui urgi nos Ministernan pa pone atencion special na nos hendenan, manera mi colega Tony Yearwood, cu ta dunando e servicio na pueblo.