Parlamentario Shailiny Tromp-Lee (MEP):
Betico a siña nos cu a base di union tur vision of meta por keda realisa

Diamars awor ta Dia di Betico. No solamente nos mester celebra su bida, pero tambe nos mester percura pa su lucha no bay perdi. Traspasa su historia y logronan pa nos pais na hasta e mas chikitonan ta hopi importante, pa nan sa ken e ta y kico tur e la haci pa nos y nos dushi isla Aruba.

En conexion cu e celebracion di Dia di Betico, mi a pasa di bishita na Scol Preparatorio Cayena. Sigur mi a pasa un rato hopi ameno. Mi a haci entrega di e pintura cu nos muchanan mester uza pa e competencia nacional di pintamento pa scolnan Preparatorio relaciona cu Dia di Betico.

Mas cu claro mi a uza e oportunidad pa conta un tiki di nos gran libertador na nos chikitinnan y despues a tene un ronda di pregunta. Mi ta convenci cu enfoke y atencion na Dia di Betico ta esencial pa crea e balor di e lucha cu nos libertador a hiba.

Betico semper a carga fe y confiansa den e mentalidad y caracter di e pueblo aki y tabata consciente cu hunto y uni bo ta logra! Betico tabata sa cu pa logra cu e pueblo ta para hunto cun’e den e lucha, e mester bin cu simbolonan cu lo crea union y lo hisa e sentimentonan di patriotismo. Door di crea union den pueblo, no obstante diferencianan di opinion riba otro terenonan, Aruba completo a para pa e lucha pa nos libertad. Sigur Betico a siña nos cu un pueblo cu un meta en comun, un meta nacional, lo logra sigur.

Manera cualkier yiu ta orguyoso di logronan di su mayornan, ta usa esakinan como ehempel, ta saca motivacion di nan y semper lo percura pa nan no keda lubida. Ami como miembro di Movimiento Electoral di Pueblo, e partido di Nos Libertador, ta orguyoso di e legado cu el a laga atras. Un fuente di inspiracion y motivacion continuo.

Feliz Dia di Betico🇦🇼