Aeropuerto di Aruba ta comprometi pa opera di un manera sostenibel

Aeropuerto di Aruba ta e prome aeropuerto na mundo pa ricibi “Green Globe Certification”

ORANJESTAD – Despues di reahusta e vision-, meta-, y obhetivonan di Aruba Airport Authority N.V. (AAA) durante aña 2021, a defini sostenibilidad como un di e pilarnan strategico mas importante, AAA a revisa e posibilidad di obtene diferente certificacion pa sostenibilidad. E certificacion ta un herment importante p’asina por verifica si e esfuerso di e compania pa cu sostenibilidad ta duna e resultado den for di un operacion mas sostenibel y cu un impacto den e Sustainable Development Goals y alabes contribui na un miho planeta.  Pa 2022, AAA a scoge pa participa den un evaluacion independiente di sostenibilidad pa por obtene e Green Globe Certification.

Siman pasa AAA a ricibi e noticia cu Aeropuerto Internacional Reina Beatrix (Aeropuerto di Aruba) a bira e prome aeropuerto na mundo pa ricibi e Green Globe Certification. Esaki ta un di e programanan di certificacion principal pa operacion sostenibel y maneho di biahe y turismo rond di mundo y AAA ta hopi orguyoso pa e logro aki. AAA a concentra su esfuersonan di sostenibilidad den su operacionnan mediante e implementacion di building management systems, reduci e consumo di energia, pilot waste projects, purchasing policies y Green House Gas (GHG) pa menciona algun. Ademas, Wings of Hope di AAA a enfoca pa ehecuta proyecto comunitario basa riba e Sustainable Development Goals, cu e meta pa crea un impacto positivo den comunidad.

CEO di Green Globe, Birte Pelayo, a menciona cu: “Manera un “hub” ocupa di turismo, Aeropuerto di Aruba a establece un punto di referencia pa e industria di aviacion den Caribe. E operacionnan di aeropuerto por contribui den gran parti pa reduci e emisionnan a traves di innovacion “on-ground” y respalda un miho planificacion di vuelo. Como un infrastructura esencial den transporte, e contribucion economico y social di e aeropuertonan ta importante p’e economianan cu tin sosten di biahe y turismo”.

“Aeropuerto di Aruba tin un liderazgo, no unicamente den Caribe, pero tambe na nivel mundial door di ta e prome aeropuerto pa ta certifica bou di Green Globe International Standard for Travel & Tourism, esun mas halto den nivel di certificacion pa operacion y maneho den e negoshi di biahe y turismo. Aeropuerto di Aruba tin conexion permanente cu e prosperidad di Aruba y su exito sostenibel lo brinda beneficio real pa comunidad”, Birte Pelayo a continua bisando.

“Aeropuerto di Aruba, e prome aeropuerto pa logra e Green Globe Certification, a logra esaki door di crea un impacto local y logrando su metanan na nivel global. Hunto cu e rekisitonan di su operacion ta cumpli cu e criterionan internacional di sostenibilidad, su programa di impacto social Wings of Hope, ta alinia cu e Sustainable Development Global Goals. SDG ta un pilar di e balornan y e mision di Aeropuerto di Aruba.

A traves di Wings of Hope, AAA ta integra educacion sostenibel den comunidad, accion ambiental den operacion di su departamentonan y ta promove e responsabilidad ambiental den su socionan; tur esaki cu e meta pa reduci transmicion y integra resistencia. “Mi ta spera cu e Green Globe Certification pa AAA, ta un influencia p’asina demas aeropuertonan como tambe tur cu ta involucra den biahe por considera con su operacionnan ta contribui na un impacto climatico positivo”, tabata palabra di Denaye Hinds, kende ta auditor oficial pa e proceso di certificacion di Aruba Airport.

Minister di Turismo y Salud Publico sr. Dangui Oduber, a comenta cu “Nos ta sumamente contento cu e anuncio cu airport di Aruba ta e prome aeropuerto na mundo cu a wordo certifica dor di Green Globe Certification, un instituto renombra mundialmente riba certificacion pa operacion y maneho sostenibel den e industria di biahe y turismo. Nos compromiso como isla pa cu sostenibilidad ta firme y esaki ta un logro sublime pa nos tur”.

Angeline Flemming, Director of Health, Safety and Sustainability pa AAA a indica cu: “AAA no por ta mas orguyoso di e logro aki. E esfuersonan di AAA y tur cu ta traha den e industria den e ultimo añanan pa haci cu nos operacionnan ta mas sostenibel a duna su fruto cu e certificacion prestigioso aki”.

Joost Meijs, CEO di AAA, a comenta cu: “Na momento cu AAA a establece su metanan y obhetivo di sostenibilidad, nos a spera di por yega cierto nivel di certificacion den e siguiente dos aña. Nos a pone meta ambicioso y den poco tempo, nos a bira e prome aeropuerto di mundo pa logra e Green Globe Certification, surpasando nos propio expectativa. Esaki ta demostra e compromiso enorme di nos trahado- y socionan pa realisa negoshi cu respet pa nos medio ambiente.”

Tocante AUA Airport

AUA Airport ta un di e aeropuertonan mas ocupa den region Caribe cu mas di 22 diferente aerolinea operando pa Aruba contribuyendo na mas cu 2.5 miyon pasahero pa aña (prome cu COVID) y cu buelonan pa 28 diferente destinacion rond di mundo. AUA Airport ta opera stabiel cu mas di 95% di su bishitantenan cu ta bin pa vakantie di cual 79% ta for di Merca y Canada, 9% for di Latino America, 8% for di Europa y 4% for di Antia Hulandes te cu augustus 2022.

AUA Airport ta reconoce cu esaki ta danki na e economia stabiel, clima politico, hospitalidad, populacion diversifica y siguridad general di nos isla. AUA Airport ta sigui expande y mehora su facilidadnan pa mantene su posicion como un di e aeropuertonan mas innovado den region.

Conoce mas di loke ta pasando na AUA Airport door di bishita www.airportaruba.com y connecta cu AUA airport riba Twitter.com/Aruba_Airport, Facebook.com/ArubaAirport, Instagram.com/arubaairport/ y  Linkedin.com/ArubaAirport.