Noticia Politica

Parlamentario Marco Berlis (MEP):

Ta evaluando e posibilidad pa subi salario minimo pa 2023

Advertisements

Durante e reunion publico di presupuesto 2023 mi a lansa diferente preguntanan cu ta preocupando pueblo. Un set di pregunta cu mi a haci tabata relata tocante di e salario minimo. E preguntanan aki a wordo respondi pa ambos minister Glenbert Croes y minister Geoffrey Wever. Ambos minister a contesta cu naturalmente prome cu tuma un decision asina aki, esaki mester cana su proceso. Dia 10 di November SER lo reuni cu e stakeholders pa asina nan por vocifera nan decision pa dia 17 di November. Ministernan a duna un amplio contesta si mester bin un aumento of no y con esaki lo por afecta pero tambe beneficia e homber chikito. A papia di un aumento di 4.3% of 7.7%. En todo caso ta SER lo onderbouw e decision, cual porcentahe esaki lo bira y comparti su recomendacion cu gobierno pronto.

Minister Geoffrey Wever a elabora riba e hecho con un aumento di salario minimo por tin como consecuencia aumento di inflacion si e comerciante ta pone e gasto di aumento aki den su prijsnan. Ne otro banda, e pensamento aki ta perhudica esnan cu tin salario minimo grandemente. Si nunca ta yuda e homber chikito anto con nan lo por acapara cu e inflacion y aumentonan di producto? Ta pa e motibo aki mi a dirigi mi mes na minister Geoffrey Wever pa comunica algun di e preocupacionan di pueblo. Esakinan tabata mas bien dirigi riba control di productonan den supermarket y e canasta basico pa pueblo por tin e informacion aki tambe:

  1. Minister por duna Parlamento un rapport of informacion con frecuentemente e ekipo cu ta controla prijs di canasta basico ta sali controla? Contesta: E ekipo ta sali tur dia y ta traha segun un rooster.
  2. Minister por duna nos cual productonan exactamente ta parti di canasta basico? Contesta: Aros, pasta, spaghetti, papa Quaker, Brinta, hariña, hariña di maishi, productonan frozen: spinashi, broccoli, vegetalnan mixto, grano seco den forma di bonchi preto, bonchi cora, bonchi lima, azeta pa cushina, productonan den bleki traha den awa: sardinchi, tuna fish, salmou, coffie, te, lechi likido pa coffie, lechi duradero den tetra pak, cuminda di baby, lechi puiro, lechi puiro pa baby.
  3. Minister por duna Parlamento un rapport di e infraccionan cu a wordo cometi pa e supermercadonan, e fecha di esakinan y cuanto infraccion tin pa luna y pa aña? Contesta: Durante aña cu a pasa a controla 749 lugar, a controla mas cu 69.000 producto, tabata tin 1558 infraccion, y mester bisa cu 2.1% di tur negoshi a causa infraccion.
  4. Minister, tin algun indicacion cu gobierno lo bay of kier introduci mas product den e canasta basico, mirando e impacto cu inflacion ta hacienda aki na Aruba? Contesta: Mester tene cuenta cu si expande e canasta basico, esnan cu ta importa por mayor lo stop di importa e productonan aki pasobra nan no lo por haci ganashi drechi riba nan. Tin comercio liber y productonan di canasta basico e productonan cu ta cay bao di comercio liber NO ta wordo CONTROLA. Solamente productonan den e canasta basico. E consumidor mester husga e negoshi door di compara prijsnan.
    Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!