Minister Rocco Tjon:

SIGURIDAD NA NOS FRONTERA TA WORDO ELEVA: E DI TRES RADAR A KEDA INSTALA

ORANJESTAD – Diasabra ultimo, a cumpli cu otro proyecto mas, caminda a instala e ekipo nobo den e Radarkamer di Cuerpo Policial di Aruba. Minister di Husticia y Asuntonan Social Rocco Tjon ta sumamente satisfecho cu e trabounan haci, y ta anuncia cu Aruba su fronteranan ta mucho mas sigura, danki na e instalacion di e tercer radar.

Eleva siguridad na nos frontera ta un di e prioridadnan den e plan di maneho di Ministerio di Husticia y Asuntonan Social. Esaki nos ta logra door di inverti for di diferente angulo. Ta inverti den duna mas atencion na material pa personal y ekiponan tecnologico nobo pero tambe a bin cu plataformanan di dialogo manera e “Justitieel Veiligheids Beraad” y e “Strategisch Grensoverleg”.

Den presupuesto 2022 a tene cuenta cu e diferente proyectonan cu mester wordo realisa pa por garantisa mas siguridad na nos frontera. E realidad ta cu sin aprobacion di presupuesto ningun proyecto por wordo ehecuta. Pues, danki na Parlamento di Aruba cu a aproba e presupuesto, pa asina nos por a adkiri un di tercer radar, cual siman pasa a wordo instala. Cu e tercer radar aki Aruba su fronteranan ta bira mas sigur. Y ta complementa e bista cu tin riba lama y nos fronteranan.

Banda di adkiri e tercer radar, a scoge pa adkiri un “software” nobo tambe, pa asina facilita e trabounan pa e personal cu ta traha den e radarkamer. Na mes momento a percura pa busca ekiponan nobo y mas sofistica pa Cuerpo Policial. Cu e ekiponan nobo aki, e analisisnan, maneho, y operacion di casonan maritimo por bira mucho mas eficiente.

Dentro di poco nos lo comparti mas proyectonan cu ya caba ta den nan fase final pa loke ta trata nos departamentonan cu ta traha incansablemente pa eleva siguridad na nos frontera.