Prome Minister den Parlamento:

𝗘 𝗔𝗥𝗚𝗨𝗠𝗘𝗡𝗧𝗢𝗡𝗔𝗡 𝗗𝗜 𝗢𝗣𝗢𝗦𝗜𝗖𝗜𝗢𝗡 𝗡𝗢 𝗧𝗔 𝗩𝗔𝗟𝗜𝗗𝗢

ORANJESTAD – Durante di tratamento di presupuesto 2023, Prome Minister a ricibi pregunta di Parlamentario Shailiny Tromp – Lee, si e presupuesto ta constitucional of no. Esaki debi cu oposicion a expresa cu e constitucion no ta constitucional. Prome Minister a contesta cu e presupuesto ta constitucional y alabes a pone documentonan concerni cu posicion di profesionalnan na disposicion di Parlamento (ter inzage).

Prome Minister a splica cu prome cu e presupuesto a yega Parlamento di Aruba, el a pasa Raad van Advies (RvA) y College Aruba financieel toezicht CAft. Ambos a duna nan consehonan y na caminda a haci cierto cambio prome cu el a yega Parlamento, cual ta algo cu sa pasa mas biaha, y cu no ta hacie inconstitucional.

Argumento falta di conseho RvA
Pa locual ta e situacion y procedura pa loke ta RvA, Prome Minister Wever – Croes a splica cu e presupuesto no tin nodi di bay bek paso e cambionan cu a haci ta den entradanan. Ora cu tin cambio den entradanan no mester pidi conseho di RvA bek, solamente si haci cambio den e gastonan. Pa motibo cu ta e gastonan ta e autorisacion/apoderacion cu Parlamento ta duna gobierno pa traha cu ne.
Un ehempel di un situacion cu a tuma luga den pasado den periodo di gobierno anterior ta, e introduccion di e ley di BAZV. Esaki a tuma luga un anochi den di dos tanda, casi na momento di votacion. Na e ocasion Marisol Lopez – Tromp tabata Presidente di Parlamento y den e fraccion di AVP e tempo ey tabatin entre otro, Mervin Wyatt – Ras y entre e Ministernan e tempo ey tabatin Mike Eman, Mike de Meza, Arthur Dowers y hasta Benny Sevinger. Nan a trece e BAZV unrato prome cu votacion paso e ta entrada y ora ta entrada por hacie sin cu e ta bay RvA.

Cambio BTW pa BBO
Pa loke ta e cambio di BTW bay pa e aumento di BBO, Prome Minister a splica cu esaki tabata na RvA y a keda cla. Gobierno a haya e conseho bek y proximamente Parlamento lo haya e conseho tambe. Pues no ta asina cu no tin conseho di RvA riba e cambio di BTW pa BBO. Pues e argumento cu fraccionnan di AVP, MAS y Accion 21 ta uza pa hustifica nan ausencia y cobra placa di pueblo sin cu ta na trabou, ta un argumento cu ya a wordo bari for di mesa door di profesionalnan caba. A informanan di esaki dia 12 di september y tambe den e “nota naar aanleiding van de verslag”.

Argumento falta di conseho CAft
E di dos argumento di oposicion ta acera di falta di conseho di CAft pa cual den e consehonan cu a pone na disposicion di parlamento, por lesa cu ley di Laft ta stipula cu ora e presupuesto caba di wordo trata, e tin cu bay bek CAFT pa nan por duna un conseho, e no ta un exigencia pa bay prome. Pues cu colega Minister Xiomara Maduro a opta pa hacie prome, ta ‘meegenomen’, pero no ta un exigencia. Consecuentemente si bo haci un cambio, manera cu a tuma luga, esey no ta haci e presupuesto inconstitucional. E presupuesto lo bay CAft despues cu Parlamento aprobe manera Laft ta stipula y asina ta cumpli cu e ley

Concluyendo, Prome Minister a bisa cu oposicion (AVP, MAS y Accion 21) sa cu nan no tin argumento pa hustifica nan ausencia. Lamentablemente na momento cu nan lo a realisa cu nan argumentonan no tin forma, orguyo of berguensa a pone cu nan no kier sinta den Parlamento y kier cuestiona profesionalnan cual ta algo cu ta lamenta.