PROYECTO ODA NA E PISCADOR :
𝗞𝗜𝗘𝗥 𝗣𝗔 𝗡𝗢𝗦 𝗥𝗘𝗗𝗘𝗦𝗖𝗨𝗕𝗥𝗜 𝗬 𝗣𝗥𝗘𝗦𝗘𝗥𝗩𝗔 𝗡𝗢𝗦 𝗛𝗘𝗥𝗘𝗡𝗖𝗜𝗔 𝗠𝗔𝗥𝗜𝗧𝗜𝗠𝗢
Fundacion Rancho ta presenta e proyecto ODA NA E PISCADOR, un proyecto di investigacion, arte y comunidad. E proyecto aki ta forma parti di nan programa celebrando e 200 aña di Oranjestad na 2024. E idea ta pa desaroya proyecto en colaboracion cu diferente institucionan y partners den e ramo di cultura, cu lo trece mas informacion y concientizacion tocante e historia di Rancho y Oranjestad. E aña aki nan ta inaugura e prome proyecto di e programa aki cu ta un colaboracion cu Plataforma Aruba, un fundacion local y non-profit cu ta traha den e ramo di educacion y mediacion di arte visual. Na 2020,
Fundacion Rancho a pidi Plataforma Aruba pa desaroya huntu cu artistanan local un serie di proyecto cu lo combina investigacion, arte y e comunidad di Aruba. E prome proyecto lo ta un colaboracion cu artista local Samuel Sarmiento. Den su obra, Sarmiento ta uza literatura y tradicion oral di Caribe, lama, y cultura. E propuesta di Sarmiento pa e colaboracion cu Fundacion Rancho ta presenta preguntanan esencial tocante nos relacion cu e lama rond di nos isla, e balor di tradicionnan oral y e importancia di comunidad. ODA NA E PISCADOR ta investiga e historia di Rancho como poblacion di piscador, su comunidad y e preservacion di herencia intangible tocante e practicanan di pesca na nos isla.
E investigacion a cuminsa e luna aki despues di a ricibi fondo di Mondriaan Fonds (Hulanda) y lo continua te zomer di 2023. E investigacion lo wordo haci door di historiador di arte y curador Ana Maria Hernandez, e artista y e comunidad di Aruba. E proceso y e informacion colecta lo wordo comparti libremente riba e canalnan digital di Fundacion Rancho y Plataforma Aruba durante e proximo lunanan. Tambe lo organiza diferente eventonan y encuentronan unda hunto lo bin cu storianan, informacion y metodonan pa preserva y presenta nos herencia cultural. E proyecto lo finaliza cu un intervencion artistico door di e artista na 2023. Pa kickstart e proyecto lo tin un presentacion diabierna 25 di November di 6:30PM pa 8:00PM na Stichting Rancho, situa na Visstraat 1, Oranjestad Aruba. Durante e presentacion curador Ana Maria Hernandez y artista Samuel Sarmiento lo conta mas over di e proyecto y e investigacion. Presidente di Stichting Rancho lo introduci e anochi y papia tocante e importancia di e proyecto den nan programa di 200 aña di Oranjestad. ODA NA E PISCADOR por ser realisa danki na e sosten financiero di Mondriaan Fonds.
