MEET & GREET AVB :
Ayera anochi den Allegra Bistro situa den Courtyard by Marriott Aruba Resort a tuma luga e prome “Meet & Greet” di Arubaanse Voetbal Bond cu e Miembronan di Prensa. E tawata un anochi placentero unda cu President di AVB Sr. Randolf Lacle a habri e anochi dunando un palabra di bon bini y gradici e Miembronan di Prensa pa nan presencia. Sr. Lacle a introduci e 6 Miembronan di Bestuur cu ta Sr. Frans Dijkhoff, Sra. Rosemin Croes, Sra. Geetanjali Khemlani, Sra. Mildred Wever, Sr. Howard Hart y Sr. Albert Lake Jr. Sr. Lacle a informa cu aparte di bestuur, AVB tin su staf cu haci trabou nan diario y di cual desde januari di e aña aki Sr. Hubert Solagnier a bira e Secretario General di AVB.
Alabes President Sr. Randolf a introduci Sra. Dyane Wiersma cu ta Women’s Football & FIFA Forward Programme Coordinator, Sr. David Abdul cu ta e Technical & Development Manager y Sr. Marvic Bermudez cu ta e Bondscoach. Sr. Randolf a informa cu e aña aki AVB a cumpli 90 aña di existencia riba 29 di januari ultimo y cu otro luna lo bai estrena e pelicula documentario y lo bai tin un buki conmemorativo. Tambe a informa tocante di e situacion actual di stadion/infrastructura di AVB. Fin di luna aki, nos Seleccion Nacional lo tin nan proximo compromiso den e Copa ABCS cu ta tuma luga na Corsou preparando asina pa participa den e torneo di Nations League cu lo tuma lugar den luna di maart 2023. Arubaanse Voetbal Bond ta contento cu e meta di e anochi a wordo alcansa y cu ta habri canal di comunicacion cu medionan di Prensa, pa asina traha hunto pa e deporte rey di Aruba cu ta futbol.
