Prome Minister Evelyn Wever – Croes:

𝐆𝐀𝐁𝐈𝐍𝐄𝐓𝐄 𝐖𝐄𝐕𝐄𝐑-𝐂𝐑𝐎𝐄𝐒 𝐈𝐈 𝐋𝐎 𝐈𝐍𝐓𝐑𝐎𝐃𝐔𝐂𝐈 𝐀𝐇𝐔𝐒𝐓𝐄𝐍𝐀𝐍 𝐏𝐀 𝐌𝐄𝐇𝐎𝐑𝐀 𝐄 𝐏𝐎𝐃𝐄𝐑 𝐃𝐈 𝐂𝐎𝐌𝐏𝐑𝐀

ORANJESTAD – Durante tratamento di Presupuesto 2023, Parlamentario Mervin Wyatt-Ras a puntra kico Gobierno ta bay haci pa mehora e poder di compra. Prome Minister Evelyn Wever-Croes a splica cu entrante Januari 2023, Gobierno lo tuma accion pa mehora e poder di compra especialmente pa alivia esnan mas vulnerable den nos comunidad. Gobierno lo baha impuesto riba tur salario y entrada di tur hende, minimum loon lo wordo aumenta, lo aumenta pensioen di biehes, lo aumenta reparatie toeslag di nos pensionadonan, y lo baha impuesto di pensionadonan door di haci calculacionnan separa. E esfuersonan aki lo mehora e poder di compra, mehorando asina e calidad di bida di nos hendenan.

Prome Minister a sigui splica, cu apesar cu gobierno lo introduci e ahustenan aki na comienso di otro aña, e deseo ta pa por haci hopi mas pa e comunidad. Lamentablemente a yega e momento di cuminsa paga e debe cu gobierno di AVP a crea, manera cu señor Mike Eman a bisa, pa “nos tur paga cu orguyo”. Prome Minister a expresa cu apesar cu pa Gabinete Wever-Croes e debe aki ta un berguensa, Aruba ta un bon pagado y lo carga su responsabilidad di paga loke e debe. E banda positivo ta cu Gabinete Wever-Croes ta trahando serio y responsabel y esaki lo crea pronto e posibilidad di por duna mas na e comunidad.

“Aruba ta pasando den momentonan dificil y e efecto mundial di inflacion ta afectando e poder di compra di nos hendenan. Inflacion a wordo causa primordialemente pa e guera cu tin actualmente na Ukraine cu ultimamente a escala. Mientras cu den Caribe a premira un porcentahe di 14.1% di inflacion cu ta hopi mas halto cu e porcentahe mundial cu ta 8.8%, Aruba ta na 6% y esaki ta danki na e gobierno actual cu ta absorbando mas gasto cu por pa baha e efecto inflatorio”, Prome Minister a duna di conoce.