WEB ARUBA N.V

Nos oficina di Departamento di ‘Nieuwe Aansluitingen’ awor ta ubica den salanan nombra pa dos ex empleado di WEB, sr. Coby Geerman y sr. Esteban Briezen q.e.p.d. Recientemente a haci e apertura oficial di ‘Sala Jacobo (Coby) Geerman’ y ‘Sala Esteban (Ban Ban) Briezen’ den presencia di sr. Geerman y yiu muher di defunto Briezen, Anira Briezen.

E salanan tawata antes un espacio pa warda piesa. Debi na falta di espacio, principalmente den futuro ora introduci SMART water meter, a dicidi di renoba e edificio y converti e den oficina.

E apertura oficial tawata un encuentro ameno den presencia di coleganan di sector di Distribucion di Awa/Customer Service y coleganan di otro departamento cu a hunga un rol den ehecucion di e renobacion.

Nos coleganan a dedica algun palabra di elogio na nos dos ex empleadonan. Sr. Coby Geerman y sra. Anira Briezen tambe a hiba nos bek den tempo y a gradici pa e gesto.