EVELYN WEVER – CROES :

𝟱 𝗔Ñ𝗔 𝗘𝗛𝗘𝗥𝗖𝗜𝗘𝗡𝗗𝗢 𝗘 𝗙𝗨𝗡𝗖𝗜𝗢𝗡 𝗗𝗜 𝗣𝗥𝗢𝗠𝗘 𝗠𝗜𝗡𝗜𝗦𝗧𝗘𝗥 𝗗𝗜 𝗔𝗥𝗨𝗕𝗔
‘𝗦𝗶𝗻 𝘁𝗿𝗮𝗯𝗼𝘂 𝗱𝗲𝗻 𝗲𝗸𝗶𝗽𝗼, 𝗯𝗼 𝗻𝗼 𝘁𝗮 𝗹𝗼𝗴𝗿𝗮’

ORANJESTAD – Desde 17 di November 2017, Evelyn Wever-Croes ta eherce e funcion di Prome Minister di Aruba. Un dia cu a marca historia pa nos pais siendo e prome hende muhe pa ocupa e funcion aki na Aruba. Premier Wever – Croes ta describi e experiencia aki como uno unico y special.

Prome Minister Evelyn Wever – Croes tabata 8 aña den Parlamento di Aruba y for di e ponto di bista ey, por a wak kico ta gobernacion. Sinembargo, despues cu a huramente pa goberna e pais, mucho mas cos a bin dilanti. Prome Minister a expresa cu e determinacion, pasion y gana pa haci un diferencia na Aruba ta locual cu a yuda pa cana riba un liña firme y enfocando pa logra e metanan.

Locual cu mas a resalta pa Premier Wever – Croes durante 5 añanan como lider di pais Aruba, ta e trabou den ekipo. El a expresa: ‘Mi ta Prome Minister pa 5 aña pero sin e ekipo di Ministernan y esnan cu ta brinda sosten na trabou, y sin ayudo di institutonan, bo no ta logra.’

Momentonan mas dificil
Den entrevista cu Prome Minister Evelyn Wever – Croes Recapitulando su 5 anãnan liderando pais Aruba, a puntra Prome Minister kico el a experiencia como e momento di mas dificil. Pa Prome Minister esaki tabata e pandemia, sinembargo el a agrega cu e pandemia no tabata e unico reto.
Na inicio di Gabinete Wever – Croes I, gobierno a wordo confronta cu un crisis social cu fayecimento di dos angelito. Esaki a cambia tur e enfasis di gobernacion y conduci na pone mas atencion y inversion den e veld social. Banda di esaki mester a atende cu e consecuencianan di e crisis humanitario na Venezuela cual a causa un crisis migratorio aki na Aruba. Ademas, tabatin un crisis financiero na Aruba pa motibo cu e finanzas publico tabata den un situacion deplorabel, y tabatin crisis den Reino y falta di confiansa pa motibo cu e gobierno anterior a haya un KB.

Asina Prome Minister a splica cu tabatin varios crisis pa atende cu ne prome cu e pandemia, pero cu tempo tambe a mustra cu aunke no tabata sa kico pa spera ora cu a drenta gobernacion, cu e ekipo tabata prepara pa tuma e miho decisionnan pa pais Aruba.
‘E ta un honor grandi pa sirbi mi pais y mi ta sintimi hopi orguyoso cu mi ta e prome ser femenino Prome Minster di Aruba. Mi ta spera cu esey ta un inspiracion pa otro hende muhenan tambe pa lucha pa loke bo ta kere aden,’ Premier Wever – Croes a termina bisando.