Secretario General MEP Endy Croes:

𝐓𝐚 𝐥𝐚𝐦𝐞𝐧𝐭𝐚 𝐬𝐦𝐨𝐞𝐬𝐣𝐞 𝐢𝐧𝐟𝐚𝐧𝐭𝐢𝐥 𝐝𝐢 𝐎𝐩𝐨𝐬𝐢𝐜𝐢𝐨𝐧

Oposicion a keda 7 dia sin traha pero a come y cobra riba “stif” di Parlamento

Secretario General di MEP a analisa e postura di oposicion y e smoesje infantil cu nan a bin cune siman pasa momento a trata presupuesto 2023. Coalicion tras di un tremendo trabou di Minister Xiomara Maduro y Minister Evelyn Wever – Croes a percura pa cana e caminda corecto y a entrega presupuesto na tempo esta pa 1 di september di acuerdo cu ley. Pa masha hopi aña esaki no tabata e caso. Asina e ley a cana su caminda a traves di DWJZ y Raad van Advies pa por yega Parlamento na tempo y wordo trata conforme ley esta e aña aki.

Oposicion su smoesje y wega ta bari for di mesa:

Lider nan di Fraccion di Oposicion (AVP, Accion 21 y MAS) ta di opinion cu CAFT tambe mester duna un conseho (banda di Raad van Advies) prome cu presupuesto wordo entrega na Parlamento. Esaki 100% no ta berdad y no ta e caso y tanto DWJZ y propio CAFT a bari esaki for di mesa. Artikel 10 di LV LAFT ta splica e proceso hopi cla. CAFT ta duna advies riba un presupuesto aproba pues despues cu e pasa den Parlamento y Artikel 11 y 12 di LAFT ta regla e trayecto di conseho pa cu esaki alabes ta regla e posibel consecuencia riba e contenido di e presupuesto. No obstante cu oposicion a wordo splica tur esaki door di expertonan, oposicion a scoge pa hunga un politica barata y sin contenido y a keda 7 dia sin drenta sala di Parlamento pa e debate cu a wordo hiba ampliamente riba presupuesto 2023. 

Keda sin traha 7 dia pero a come y cobra riba “stif” di Aruba:

Oposicion tabata yega trabou firma lista di presencia pa asina nan haya derecho riba un cuminda como cu e reunionnan ta dura normalmente rond 12 ora pa dia. Oposicion ta bay sinta bebe coffee otro banda di caminda entre otro na Starbucks unda nan a wordo mira varios dia pa varios ora. Den break rond merdia oposicion ta drenta edificio di Parlamento pa reclama nan cuminda y ta bay sinta come hunto pa despues bandona Parlamento bek. Nos ta lamenta e hecho aki masha profundo. E homber chikito si e tuma esaki como ehempel (voorbeeldfunctie) sigur su hefe lo desconta su dianan di trabou for di su salario y te hasta lo kite for di trabou. Pues e homber chikito no por actua deshonesto manera oposicion. Pueblo mester exigi pa oposicion deposita 7 dia di salaris na comunidad por ehempel Casa Cuna of Imelda hof. Inaceptabel e actuacion infantil di oposicion. Finalisando oposicion en blok a actua di e manera aki pa sostene AVP pa asina desvia e atencion di e caso di Benny kende henter e mesun siman ey tabata den corte y pa evita cu pueblo haya sa mas di e corupcion historico di Benny  y AVP. Pa e rason aki AVP a bini cu e strategia pa no drenta sala di Parlamento y MAS y Accion 21 manera dos carne sin rumbo a cay den AVP su wega. Tristo pero ta bon pa pueblo sa y pueblo mes lo percura pa nunca e combinacion aki ( coalicion di oposicion) no lo haya oportunidad pa maneha e pais aki. Nunca pero nunca “mas” ni MAS ni Accion 21 y sigur NO AVP!