Minister Dangui Oduber

𝗠𝗜𝗡𝗜𝗦𝗧𝗘𝗥 𝗢𝗗𝗨𝗕𝗘𝗥 𝗣𝗥𝗘𝗦𝗘𝗡𝗧𝗘 𝗡𝗔 𝗦𝗛𝗢𝗪 𝗗𝗜 𝗦𝗘𝗔 𝗕𝗨𝗡𝗜𝗧𝗔, 𝗦𝗘𝗔 𝗕𝗢 𝗠𝗘𝗦

ORANJESTAD – Diadomingo, 20 di November, cual ta Dia Internacion di Derechonan di Mucha, minister di Turismo & Salud Publico a participa na e show “Sea bunita, Sea bo mes”, cual a pone enfasis riba inclusion.

E show aki tabata consisti di un elenco di mucha y hoben cu hopi entusiasmo pa mustra Aruba kico tur nan por atraves di canto, baile, actuacion y modelahe celebrando hunto dia internacional di derecho di mucha.

Minister Oduber tabata tin e honor di a modela hunto cu Nina Andrea na e show di Mi Mes Un Heroe. E mandatario ta bisa cu henter e evento tabata “Un bunita show unda cu e meta tabata pa consientisa un y tur ariba e importancia di inclusion. Tur mucha tin e mes un derecho pa proteccion, educacion apropia, cuido di salud, trato justo y un hende pa scucha nan”.

Sr. Oduber ta manda palabranan di pabien na tur e organisadornan di e evento asina special aki, y tambe kier corda cu derecho di mucha ta nos deber como un comunidad. E evento tabata un bunita iniciativa, caminda cu tur mucha a pasa un rato agradabel cu nan famia y sernan keri.