Parlamentario Shailiny Tromp-Lee (MEP):
𝗣𝗮𝗿𝗹𝗮𝗺𝗲𝗻𝘁𝗼 𝗛𝘂𝗯𝗲𝗻𝗶𝗹 𝗰𝗿𝗲𝗮𝗻𝗱𝗼 𝗵𝗼𝗯𝗲𝗻𝗻𝗮𝗻 𝗰𝗿𝗶𝘁𝗶𝗰𝗼, 𝗮𝗰𝘁𝗶𝘃𝗲 𝘆 𝗶𝗻𝘃𝗼𝗹𝘂𝗰𝗿𝗮
Diadomingo mi tawata tin e grato placer di por a asisti na un actividad organisa pa Fundacion Parlamento Hubenil Aruba (FPHA). Un actividad dirigi riba nos hobennan, esta “Debate & Speaking Championship 2022”.
E actividad aki tabatin como meta pa brinda e hobennan na Aruba un plataforma unda nan por practica nan habilidad pa debati y presenta dilanti un publico. Nan a keda prepara mediante diferente workshop cu nan a ricibi durante dos siman prome cu e evento. Mi por bisa cu e actividad aki sigur ta un manera importante pa crea hobennan activo, involucra y critico pa cu desaroyonan di pais Aruba como tambe desaroyonan mundial. E ta hopi importante pa e desaroyo di nos pais pa nos forma hobennan critico, cu sa con pa trece nan opinion dilanti y FPHA sigur ta aportando na e desaroyo aki.
E tema di e evento aki ta tabata den liña cu e tema internacional di Dia Mundial di Mucha segun Nacionnan Uni cual e aña aki a enfoca riba Inclusion, Pa Tur Mucha. Mi a gosa di e partinan cu ami por a experiencia. Sigur tin algun hoben a resalta y mi por a mira claramente futuro lidernan den e evento aki.
Mi kier manda un bes mas un pabien grandi na tur hoben cu a participa y a tuma e curashi pa para dilanti un publico y expresa nan pensamento y opinion. Tremendo decision! Mi ta spera cu nan ta sigui traha riba e formacion personal aki y cu nan invita mas hoben rond di nan pa participa tambe den e formacion aki. Pa finalisa mi kier manda tambe un un palabra di pabien na Directiva completo di FPHA y mi ta spera cu pronto nos por disfruta di un otro evento asina.
