Booshi Wever:

MI TA SPERA CU MINISTER ARENDS ACEPTA MI RETO PA BAI DEN UN DEBATE PUBLICO RIBA SERLIMAR! (parti 2)

Den e articulo parti uno, mi a desbarata delaster un desinformacion cu Ursell a trece padilanti. Den e parti 2 aki mi kier mustra riba e plan diabolico cu e minister aki tin, cu sosten di parti di e gabinete Eveline Croes y den e caso aki hunto cu 21 miembro di Parlamento.

Ya nos sa cu Ursell a saca “verwerking” como tarea di Serlimar. E ta purba tur manera di hustifica e desicion MACHIAVELICO aki. Den e cifranan cu mi ta posee ta mustra cu Serlimar SG tabata ricibi un entrada substancial di 5.4 miyon pa un trabou cu Serlimar SG ta haci pa gobierno. Trabou cu e empleadonan di Serlimar SG semper a haci manera cu mester ta, teniendo cuenta cu ley ambiental di Aruba y cu tratadonan internacional. Na 2018, sin ningun motibo Otmar a duna un compania local e “parti” aki di “verwerking” sin ningun clase di Destaho Publico, pagando e compania aki basta mas cu loke Serlimar tabata ricibi. Awor Serlimar SG NO ta ricibi e  5.4 miyon florin mas. Y Ursell kier pone hende kere cu ta otro hende a causa e DEBACLE di Serlimar SG.

Ta conoci cu Serlimar SG tin debe tur caminda, pero no ta e mesun Otmar a scohe pa paga su SPONSOR prome y keda SIN paga e.o. belasting? Of aki tambe bo kier culpa e empleadonan? Hasta un mucha di kleuterschool por compronde cu si saca e parti cu bo ta ricibi placa afo (verwerking) alo largo Serlimar SG lo muri! Esaki lo nifica cu hopi empleado (no e ambtenaarnan so) lo perde trabou! Kico lo haci cu e ambtenaarnan cu NO tin arte ni parte di e corupcion y mal maneho di e gerencia e.o. di Davelaar cu a declara publicamente cu ta INSTRUCCION ela sigui di Otmar Oduber himself!

Despues abo mes a saca otro parti di “verwerking” for di e tarea di Serlimar SG! Atrobe sin Destaho Publico dunando companianan local contractonan miyonario (tire)! Atrobe e empleadonan no tin arte ni parte den e “mal gobernacion” aki. Algo totalmente incorecto, un acto cu por wordo categorisa como di NO ta integro. Un acto sumamente “onwaardig” di un minister responsabel pa INTEGRIDAD!

Bo ta carece di integridad ora mi tende di e asina yama “fuel-gate” cu bo kier pone

den “doofpot” y pa colmo den un compania den bancarota y cu un Raad van Toezicht den funcion! Kico e RvT y e management team a haci cu esaki? E director nobo lo tuma paso pa haya e 600.000 florin aki?

Bo ta na altura di esaki toch of bo ta scohe atrobe pa cover up? Atrobe ta e compania amigo y sponsor di Otmar ta involvi!

Ta ken tabata paga pa fuel e machinnan di e compania en cuestion? Ta kende ta responsabel cu e compania estatal SERLIMAR, cu tin problemanan financiero grandi, ta esun cu ta hunga Sinterklaas y ta paga pa e tankmento di diesel aki.Esaki ta normal? Ta ken bo kier pone man riba su cabez y purba di scapa su peyeho? Esaki ta INTEGRO?

Ta hopi tristo di constata cu NIUN partido politico ta bisa algo al respecto! Pa colmo e sindicatonan tambe ta “muisstil”! Dicon?? Pasobra cu simpelmente ta “cover-up” e corupcionnan di Otmar pa exoneré di tur cos. Of bo a haya e orden pa no persigui Otmar pa no incrimina e prome-minister y partido MEP? En todo caso Ursell sigui cu bo “rest pakket”, pero ami lo keda para na vanguardia di berdad y bienestar di nos pueblo. Manera ya mi a bisa caba, mi a aserca HOF pa exigi pa Ministerio Publico hasi un investigacion encuanto e corupcionnan y mal maneho di bo amo Otmar na Serlimar. Pues pronto bo careda di biná lo caba! Ken lo bo bay culpa e ora ey? Bo “restpakket” atrobe lo impedi bo di pidi investigacion di e Prome Minister y mas hende den e gabinete Eveline Croes cu tambe ta totalmente involvi den e compra corupto di e incenirator?