CHRIS STRICK DI CORSOU TA JOIN EMISORA NOBO NA ARUBA X-FM 102.7
E conocido y popular locutor, rapper y maestro di ceremonia Chris Strick, dialuna awor lo ta ‘on air¬’ via e dial di FM na Aruba. Ta trata aki di su mesun programa ‘Morning Connection’ cu lo ta live riba radio for di 10 or di mainta te 12 or di merdia atravez di e frecuencia di radio 102.7 fm, ‘The Future of Media’. Ta trata aki di Aruba su emisora di mas hoben esta X-FM. Durante e ultimo siman nan e emisora a bin ta crece den popularidad rond di Aruba. Chris Strick no ta un nomber desconoci den e mundo di farandula. Pa bastante aña caba Strick ta un di e caranan principal di e grupo Da Ridlaz. Pa varios aña tambe e ta trahando na radio Direct Life Corsou. Na varios ocasion e tabata na Aruba tambe pa anima mayoria evento grandi y ta fungi como ‘influencer’ pa diferente marca.
Pa e gerencia di X-FM esaki sigur ta un placer pa por jama Chris Strick bon bini na e elenco di e emisora. E programacion ta consisti actualmente di show di mainta ‘Wake Up Crew’ presenta pa Big Rig, Ramiro, DJ V y Cindy. Despues Chris Strick lo ta den aire di 10 or di mainta pa 12 or. Pa 2’or ta drenta den aire Tarrick Ras cu ‘Afternoon Flowz’ y despues pa 5’or, Mark Benson Denz ta presenta ‘Newsflash’ cu ta un resumen di e noticianan di mas importante di dia. Pa 6 or di atardi, Shark Garrio ta presenta ‘The Periodico Show’. Pronto lo tin algun programa mas cu lo bay den estreno.
E idea tras di X-FM no ta pa ta solamente un emisora. Ta trata aki di un organisacion di media audio-visual. E Proyecto tambe ta inclui X-TV unda cu tur e cancionan, programacion y entrevistanan por wordo mira cu imagen via facebook of e website www.x-fmaruba.com. Tambe e organisacion ta parti di tur eventonan grandi riba nos isla.
