Prome Minister Evelyn Wever-Croes:
Durante e siman di bishita di trabou na Den Haag, Hulanda
PROME MINISTER Y MINISTER DI FINANSA A REUNI CU ALGEMENE REKENKAMER DI HULANDA
Dialuna 28 di November, Prome Minister Evelyn Wever-Croes hunto cu Minister di Finansas, Xiomara Maduro, a cuminsa cu reunionnan durante e siman di bishita di trabou na Den Haag, Hulanda pa trata e tema financiero di Aruba. E mandatarionan di nos pais durante e siman aki lo reuni cu varios instituto pa asina splica con e situacion financiero di nos pais ta y con Aruba ta recuperando. Aruba su recuperacion ta hopi impresionante.
Dialuna e mandatarionan a reuni cu Algemene Rekenkamer di Hulanda cu ta traha basta estrecho cu Algemene Rekenkamer di Aruba. E instituto aki di Hulanda ta comparti opinion di Gobierno cu Aruba a dal pasonan interesante pa den 3 aña ya tin un surplus den presupuesto. Algemene Rekenkamer di Hulanda ta encarga tambe pa controla Gobierno di Hulanda riba e sosten financiero cu nan a duna Aruba por lo tanto ta hopi importante pa nan sa con Gobierno di Aruba tambe ta mira tur esaki.
E tema cu nos a toca awe ta e recuperacion di Aruba, con Aruba ta recuperando y pakico ta asina importante pa nos tin e claridad di e fiansa cu nos a haci cu Hulanda durante temporada di pandemia. Nos a presenta con Aruba ta recuperando economicamente cu turismo pero tambe financieramente.
“Algemene Rekenkamer di Hulanda a keda impreciona pa wak con den 3 aña nos ta bay tin un surplus otro aña. Nan tin e informacion tambe pasobra nan ta controla e Gobierno di Hulanda riba e fiansanan cu nan a duna nos y e condicionnan cu ta bay wordo aplica na momento cu mester paga parti di e debe of ful e debe bek. Pa mi ta importante pa nos hendenan na Aruba sa cu nos ta tumando e situacion aki hopi na serio y cu nos ta tumando pasonan grandi pa recupera di e efectonan di e pandemia”, Prome Minister a duna di conoce.
“Mi mester bisa cu nos a wordo bon ricibi, e storia di exito di Aruba ta hopi impresionante y bo ta wak cu e ta crea perspectiva p’e Hulandes ora e scuche di nos mes. Nos tin varios reunion e siman aki y mi tin fe y confiansa cu nan ta bay ta bon”, Prome Minister Evelyn Wever-Croes a expresa.
