Subsidio pa sosten na studiantenan di Caribe y starter riba mercado laboral

Te cu 2027 e fundacion WeConnect ta haña subsidio anualmente pa e sosten na studiantenan Caribense y personanan cu ta cuminsa riba mercado laboral (starter). Na 2023 ta trata di un montante alrededor di 200.000 euro. Hulanda ta pone e montante aki na disposicion via e ministerio di Asuntonan Interior y Relacionnan den Reino, pa asina asisti studiantenan y starter pa cuminsa riba mercado laboral den parti Caribense di Reino despues cu nan a finalisa nan estudio. Esaki ta necesario pa motibo cu tin un necesidad grandi pa profecionalnan na e islanan.

Studiantenan di parti Caribense di Reino ta enfrenta retonan grandi, tanto social, financiero como cultural. Despues di nan estudio personanan di Caribe cu a finalisa nan estudio y cu ta cuminsa riba mercado laboral, hopi biaha ta keda traha na Hulanda. Hopi biaha esaki ta mas atractivo, entre otro pa motibo cu e salario na parti Caribense ta relativamente abao, mientras e starter hopi biaha a acumula un debe di estudio halto.

Ademas, hopi biaha ta dificil pa dunado di trabao y potencial trahado haña otro dor di e distancia entre Hulanda Europeo y e parti Caribense di Reino. Pa e motibo aki hopi biaha starter tin dificultad pa drenta e mercado laboral Caribense. Esaki ta un causa importante pa e problemanan di capasidat cu e gobiernonan den parti Caribense di Reino ta enfrenta.

Secretario di Estado di Relacionnan den Reino, Alexandra van Huffelen: “Ta importante pa nos tin atencion pa e grupo aki di studiante y starter. Pa nan propio futuro, pero tambe pa fortifica e islanan. Durante mi bishitanan na e islanan mi a mira cu e gobiernonan tin un necesidat grandi pa profecionalnan. Pa esei nos ke haci mas atractivo pa hende regresa y sirbi nan isla natal.”

Fundacion WeConnect tin como meta pa conekta Caribe cu Hulanda Europeo via entre otro proyektonan educativo. Nan ta dedica na mehoracion di e exito di estudio y bienestar di e studiantenan Caribense na Hulanda. Nan ta haci esaki entre otro dor di ofrece un netwerk, duna training di presupuesto, tene encuentro y duna informacion na scolnan den Caribe. Tambe e fundacion ta stimula starter pa drenta mercado laboral den Caribe y asina fortifica e capasidad administrativo di e islanan den parti Caribense di Reino.