Think Common Good Beach Clean-up event exito!

E sentido di responsabilidad pa nos pais den Pueblo ta grandi!

Diadomingo, 27 di November Partido AVP den colaboracion cu su organisacionan a bolbe trece hopi hende di nos comunidad hunto pa un bon causa. Den un ambiente di “haci bon pa nos pais” un grupo grandi di hoben y grandi a alogmera den area di Grapefield/Boca Grandi pa haci e area limpi. E tabata grandioso BEACH CLEAN UP EVENT cu meta pa mantene e nos costa di Boca Grandi/Grapefield limpi y alabes duna e mensahe cu ta nos mes mester cuida nos pais! Ela bira un mainta placentero unda cu famianan, amistad y coleganan a bini hunto y comparti un rato ameno, mientras cu nan tabata participa na un accion positivamente pa nos Pais: un accion di BON COMUN.  E “Think Common Good Beach Clean Up” a mustra den forma concreto kiko Partido AVP ta sembrando den curason di nos comunidad: haci bon pa nos tur (Bon Comun) como criterio y guia pa tur loke nos haci ta cu e bienestar general na prome lugar!

Lider di Partido mr. Mike Eman acompana pa parlamentarionan y candidatonan tambe tabata presente pa comparti e importancia di e evento y e pensamento di BON COMUN. Partido AVP ta cultivando e pensamento di e Bon Comum den nos comunidad pa e sirbi comun un forma basico di pensa pa henter nos pais. Despues di a organisa un existoso simposio tocante e “Restauracion di e Bon Comun” , a logra inspira nos comunidad pa practica e Bon Comun tambe diasabra. E particpacion di un grupo grandi di muchanan, hobenannan, adulto y hasta nos grandinan na e Beach Clean-up event, tabata muestra cu e tema di e “E Bon Comun” pa nos comunidad pa cuminsa crece. Personahenan prominente den nos comunidad, manera e campion mundial Sarah Quita Offringa a sostene e evento di THINK COMMON GOOD BEACH CLEAN-UP. Y no por nada. E ta importante pa den e contexto precupante cu nos comunidad ta bibando aden, pa tin momentonan manera esaki pa inspira, motiva y crea speransa nobo den nos comunidad.

E despunta den e gobernacion actual, unda mucho hopi hende den nos comunidad ta perde speransa den e posibilidad di un miho futuro, AVP ta rebiba e compromiso cu e “Bon Comun” ta e caminda pa cana pa transformacion di nos Pais den uno mas husto y bon pa nos tur. THINK COMMON GOOD ta un continuacion y profundisacion di AVP su prioridad pa Aruba. E necesidad pa un renobacion di nos sistema economico, politico, social ta bira dia pa dia mas bisto. Hopi mester wordo hasi den e proximo gobernacion pa crea atrobe un motivacion nacional pa saca nos Pais padilanti y saca nos pueblo for di sufrimento. E motivacion aki ta inicia cu e  pensamento di e BON COMUN, cu ta reta nos tur pa pone e interes y deseonan di nos comundad na prome lugar. Pa nos por realisa un Bon Comun pa henter nos Pais, cambio di Gobernacion ta necesario!

Partido AVP ta preparando pa e proximo gobernacion y lo percura pa implanta un guia moral den e manera cu nos ta duna contenido na nos sistema economio, politico, social pa asina esakinan por ta na servicio di nos comunidad. Diadomingo nos por a mira un multitud di hende homber y hende muher cu a lanta determina pa cuminsa construi e caminda pa un Gobernacion di e BON COMUN: un Aruba cu ta bon pa nos tur! Partido AVP ta gradici nos comunidad cu a participa na e evento di THINK COMMON GOOD BEACH CLEAN-UP.