Parlamentario Marco Berlis (MEP):
Radar nobo y bon cooperacion entre departamentonan hudicial ta dal baho mundo un golpi duro
Siman pasa nos por a tuma nota di un noticia unda den oranan di marduga di diaranson november 23 2022, radarnan nobo di pais Aruba a detecta un boto cu tabata procedente di Venezuela, cu kier a purba drenta nos awanan teritorial. Inmediatamente a bati alarma pa asina Kustwacht y helicopter di Polis drenta den accion pa intercepta e boto aki. Mesora Kustwacht a subi lama y a logra mira e boto y un persecucion a cuminsa. No a dura mucho pa por a intercepta e boto aki y e shete ilegalnan abordo. E informe ta mustra cu a haya un cantidad grandi di substancianan prohibi den e boto y cu na caminda nan a tira masha hopi bulto den lama. Pa por a detecta e bultonan aki, e helicopter di Polis a sigui patruya den becindad.
Mester subraya e poder di bon cooperacion entre e departamentonan hudicial cu a coopera cu otro pa tur esaki por a bira posibel. For di akinan mi ta manda un pabien grandi na tur. Nos por constata un gran progreso den e combatimento di droga, mensensmokkel, y di arma cu ta trata na drenta nos pais. Ora cu e departamentonan hudicial tin nan recursonan na nan disposicion y tin un bon cooperacion y comunicacion, nos fronteranan y sociedad por keda for di peliger.
Nos por corda ainda con e mesun departamentonan hudicial aki a pasa un tempo scur y a sufri bao mando di ex-minister di Husticia Arthur Dowers, kende a desmantela e radarnan, kita helicopter di polis, y practicamente desmantela Guarda Nos Costa. E tempo ey droga, arma y criminalidad tabata florece na grandi. Awendia nos por wak con minister Rocco Tjon su vision pa mantene nos fronteranan sigur y aumenta e seguridad den nos sociedad a bira un realidad. Pasonan y decisionnan clave den diferente areanan y departamentonan hudicial ta hacienda un gran diferencia den nan maneho y efectividad! Ta pesey mi kier a felicita tur trahador di e departamentonan Hudicial y cu ta parti di e ekipo di strategisch grensoverleg pa nan trabao duro y efectivo. Un pabien tambe ta bay pa minister Rocco Tjon pa su bon trabao, enfoke y determinacion pa ekipa y empodera nos departamentonan hudicial, cu awe ta golpiando e baho mundo di un forma fuerte y resiliente.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
