Parlamentario Darlaine Guedez-Erasmus (MEP):
Di 1 profesional pa 12 profesional cu ta certifica pa interoga muchanan
E tema di Abuso di Mucha sigur ta keda un tema imporante y central pa henter nos comunidad como tambe pa nos den parlamento. Desde cu mi a drenta na januari 2020 e tematica aki tin mi atencion y mi ta keda monitorea e desaroyonan den e area aki hopi di cerca. Si mi bay bek nos por corda cu dia 13 november 2020 den Parlamento di Aruba a invita Jeugd en Zeden Politie pa un hoorzitting encuanto abuso di mucha pa asina nan por comparti nan retonan y cua ta e areanan cu nan ta desea di desaroya mas liher cu ta posibel.
Un punto cu sigur a resalta ta e punto di verhoor “interogacion” di e mucha. E ta asina cu esaki mester tuma lugar den un corto tempo pa asina conduci na miho investigacionnan. Na es momento, pues den 2020, Jeugd en Zeden Politie tawata tin solamente 1 persona cu tawata cualifica pa haci e trabou aki. Esaki tawata haci’e dificil pa sigura cu cada bes cu tin un caso tin un persona cualifica pa atende cu e caso. Dibiaha a considera esaki como un prioridad y a crea oportunidad pa otro recherchenan sigui e curso di ‘verhoor minderjarigen’.
Cu hopi alegria nos por a tuma nota con siman pasa 12 profesional a termina e curso aki exitosamente. Na december e parti teoretico di e curso a tuma luga, y awor nan a conclui cu e parti practico, y asina awor ful “Jeugd en Zeden Politie” (JZP) ta certifica. Ademas di e profesionalnan di JZP, a certifica e diferente psicologonan di Orthopedagogisch Centrum, Directie Voogdijraad y KIA. Pues ta un ekipo completo a haya e oportunidad y a tuma esaki tambe man habri na bienestar di nos muchanan.
Despues di a vota PRO dia 26 juni 2020 como Parlamentario pa hisa e castigo di abuso sexual, mi ta contento di mira cu tin otro desaroyonan tumando lugar riba e area aki. Pueblo kier mira sentencianan halto pa e personanan cu ta comete e actonan doloroso cu nos muchanan y pa esaki no mester solamente ley cu castigo halto pero tambe un bon investigacion cu suficiente prueba. Awor cu e 12 professionalnan aki nos ta un stap mas cerca pa logra esaki.
Sinembargo mi kier termina bisando cu nos no mester laga e situacion yega asina leu. Nos tin cu enfoca tambe riba e aspecto preventivo. E ta importante pa tur mayor keda semper cu bista riba bo yiunan, scuchanan ora nan kier conta bo algo y ban tuma nos muchanan na serio. Un comunidad conciente ta un comunidad fuerte, y un comunidad fuerte ta un comunidad sigur pa nos muchanan.