Parlamentario Marco Berlis (MEP):
OPENBARE BIJEENKOMST CU DOW Y DNM RIBA E TEMA DI RWZI Y RAPPORT CARMABI.

Riba Diahuebs mainta, januari 27, 2022 Parlamento a reuni cu expertonan di DOW, DNM y minister Ursell Arends. Den e reunion aki DOW y DNM a duna un tremendo presentacion di e proyectonan di RWZI, nan historia, inversionan haci, inversionan pa futuro, renobacionan haci y mas. Atrabes di e presentacion aki a splica detayadamente cada aspecto di RWZI. Despues di e informacion balioso comparti, tur parlamentario por a lansa pregunta di e duda y preocupacionan cu nan tabata tin. E mainta aki sigur tabata uno hopi educativo, y DOW, DNM y minister Ursell Arends a comparti informacion excelente pa nos pueblo compronde e desaroyonan cualnan ta tumando lugar na RWZI. Tambe por a conoce di cerca e vision di DOW y DNM pa cu RWZI su futuro.

Lamentablemente, un biaha mas fraccion di MAS y di Accion 21 a demostra di no kier consulta ni haci pregunta na e expertonan di DNM y DOW. Nan a expresa di no kier haci pregunta ni vocifera nan inkietudnan cu e expertonan cu por duna nan contestacion y informacion alcaso, corecto y profesional. Den e formato aki di e Openbare Bijeenkomst, e plataforma ta brinda e parlamentarionan e recursonan pa ricibi informacion cu ta empodera e politico riba e tema encuestion. Lidernan di fraccion di Mas y Accion 21 un biaha mas a expresa di kier hiba debate politico so, y no kier dialoga en lo absoluto cu esnan cu tin e experencia y conocimento pa splica tur cos corectamente. Di e forma aki nan ta demostra cu nan kier sigui den nan politica bieu, di sigui lastra hende y papia mentira pa manipula pueblo.
Ser critico mester ta basa ariba informacion corecto, y educando bo mes riba e area encuestion cu bo kier cuestiona. Mientras cu oposicion ta hunga wega politico cu e situacion di RWZI, mester recorda pueblo cu conferencianan di prensa a wordo haci na October y November 2021 pa gobierno, pa informa pueblo di e accionan cu gobierno lo tuma pa cuminsa resolve e problema di RWZI. Na ningun momento a trata na sconde nada pa pueblo. Pesey, un biaha mas mi deseo ta pa trece mas informacion alcaso y corecto pa pueblo. Semper bay por verifica y confirma esaki cu e video di e Openbare Bijeenkomst di awe Diahuebs januari 27, y scucha y wak tur informacion pa bo mes.

Un poco di e historia di RWZI;
• Bubali; Construi na 1972, cu un capacidad di procesa 4500m3/dia
• Parkietenbos; Construi na 2007, cu un capacidad di 1500m3/dia
• Zeewijk; Construi na 2008 cu un capacidad di 5000m3/dia

Timeline / Historia
• Na 1995 a haci e prome renovacion: primary, secondary y advanced upgrade na RWZI Bubali
• Na 2007 a haci e di dos renovacion: Primary and advanced treatment upgrade.
• Na 2007 tambe a pone den functon RWZI Parkietenbos. Na 2008 a pone den funcion RWZI Zeewijk. Na 2009 Witteveen+Bos a recomenda pa cuminsa procesa e sludge na Parkietenbos.
• Na 2014 Witteveen+Bos a recomenda un aeration Tank nobo cu mester a costa 12.5 Miyon, cual no a wordo inverti e tempo ey, y asina pone mas presion riba e planta di Bubali.
• Na 2015 mester a haci un mantenimiento urgente na e planta pa 1 miyon florin.
• Na 2017 TNO Caribbean a bolbe recomenda pa cumpra un aeration tank nobo pa 13 miyon.
• Na 2018 a recomenda pa cumpra ekipo y parts. Na 2019 a recomenda cu mester a haci un mantenimiento critico di ful e planta. Na 2020 a inverti 3.6 miyon pa algun parts esencial pa e planta. Adicionalmente, entre 2021-2022 a haci inversion di 3.6 miyon y 830 mil florin den e planta di Bubali.

Tambe expertonan di DOW y DNM a duna claridad di e funcionalidad y operacion di e planta na Bubali;
• Ta bezig ta kitando e lelienan y e riet cu tin, pasobra nan ta stroba pa e awa den Bubali Plas ta wordo purifica na un forma natural.
• Ora awa ta hopi halto, pa evita overstroming den vecidario, ta habri sluis pa e awa cu ta procesa caba, sali bay lama. Awa cu no ta procesa no ta yega lama.
• Riba presupuesto 2022 tin 16 miyon florin cu lo bay woro inverti pa e planta por ricibi algun cambio y mantencion necesario pa algun aña.
• E inversionan aki tambe lo sirbi pa hisa ainda mas e calidad di e awa procesa.
• Pa renoba e plantanan lo costa alrededor di 60 miyon florin.
• Mientras tanto DOW y DNM ta sigura cu e awa na nos beachnan ta safe pa landa den dje y no mester preocupa.
• Mester keda subi e calidad di e awa procesa pa asina yuda salvaguardia nos rif di coral.

Tambe lo inverti den expansion di e capacidad di e plantanan pa procesa awa;
• na 2025: Bubali lo subi di capacidad te cu 15.000m3
• na 2026: Parkietenbos lo subi capacidad te cu 3.000m3

Dow y DNM tin un vision grandi y amplio con pa haci e facilidadnan di RWZI traha placa den futuro y opera den un economia circular, unda cu lo produci diferente producto for di e planta pa bende of ta usa como energia y asina cumpli cu e vision di SDG’s.
• Bende awa procesa na esnan cu ta planta of cu ta uza pa golf course.
• Recicla e sludge pa uze como fuel pa kima esaki den su planta cu na su turno lo produci e coriente cu e planta mester. Asina e planta lo bira self-sustainable.
• Y tambe lo usa algun di e resto di productonan pa fertilizer, y asina bende esaki riba Mercado.